ഇന്ത്യയുടെ ചന്ദ്രയാന് 2 ദൗത്യം അവസാന നിമിഷം ലക്ഷ്യത്തിലെത്താതെ പോയത് രാജ്യത്തെ ജനതയ്ക്ക് നിരാശ സമ്മാനിച്ചിരുന്നു. ചന്ദ്രയാൻ -2 ന്റെ വിക്രം ലാൻഡർ ചന്ദ്രോപരിതലത്തിൽ സോഫ്റ്റ് ലാൻഡിങ് നടത്താനുളള ശ്രമം പരാജയപ്പെട്ടു. ഇതോടെയാണ് മുൻ ചാന്ദ്ര ദൗത്യങ്ങളുടെ കണക്കുകൾ വീണ്ടും ചർച്ചയാകുന്നത്.
കഴിഞ്ഞ 60 വർഷത്തിനിടെ അമേരിക്ക, റഷ്യ, ചൈന, ഇസ്രയേൽ രാജ്യങ്ങളുടെ നിരവധി ചന്ദ്രയാൻ ദൗത്യങ്ങൾ പരാജയപ്പെട്ടിട്ടുണ്ടെന്ന് യുഎസ് ബഹിരാകാശ ഏജൻസിയായ നാസയുടെ 'മൂൺ ഫാക്റ്റ് ഷീറ്റ്' കണക്കുകൾ പറയുന്നു. കഴിഞ്ഞ ആറ് ദശകങ്ങളിൽ ഏറ്റെടുത്ത ചാന്ദ്ര ദൗത്യങ്ങളുടെ വിജയ അനുപാതം 60 ശതമാനമാണെന്ന‌ാണ് 'മൂൺ ഫാക്റ്റ് ഷീറ്റ്' കണക്കുകൾ പറയുന്നത്. ഇക്കാലയളവിൽ 109 ചാന്ദ്ര ദൗത്യങ്ങളിൽ 61 എണ്ണം വിജയിക്കുകയും 48 എണ്ണം പരാജയപ്പെടുകയും ചെയ്തു.
ഈ വർഷം ഏപ്രിലിൽ ഇസ്രയേലും ചാന്ദ്രനിൽ ലാൻഡ് ചെയ്യാനുള്ള ദൗത്യം നടത്തി പരാജയപ്പെട്ടിരുന്നു. 1958 മുതൽ 2019 വരെ ഇന്ത്യയും യുഎസും യുഎസ്എസ്ആർ (ഇപ്പോൾ റഷ്യ), ജപ്പാൻ, യൂറോപ്യൻ യൂണിയൻ, ചൈന, ഇസ്രയേൽ എന്നിവർ വ്യത്യസ്ത ചാന്ദ്ര ദൗത്യങ്ങൾ നടത്തിയിട്ടുണ്ട്. ഓർബിറ്ററുകൾ, ലാൻഡറുകൾ, ഫ്ലൈബൈ എന്നിവ ദൗത്യത്തിനായി ഉപയോഗിച്ചു. ചന്ദ്രനെ പരിക്രമണം ചെയ്യുക, ചന്ദ്രനിൽ ഇറങ്ങുക എന്നീ ദൗത്യങ്ങളിൽ മിക്കതും പരാജയമായിരുന്നു.
ചന്ദ്രനിലേക്കുള്ള ആദ്യ ദൗത്യം 1958 ഓഗസ്റ്റ് 17 ന് യുഎസ് ആസൂത്രണം ചെയ്തിരുന്നുവെങ്കിലും പയനിയർ 0 വിക്ഷേപണം പരാജയപ്പെട്ടു. 1959 ജനുവരി 4 ന് സോവിയറ്റ് യൂണിയൻ ലൂണ 1 ആയിരുന്നു ചന്ദ്രനിലേക്കുള്ള ആദ്യത്തെ വിജയകരമായ ദൗത്യം നടത്തിയത്. ആദ്യത്തെ 'മൂൺ ഫ്ലൈബൈ' ദൗത്യം കൂടിയായിരുന്നു അത്. ആറാമത്തെ ദൗത്യത്തിൽ മാത്രമാണ് സോവിയറ്റ് യൂണിയനു പോലും വിജയം നേടാനായത്.
1958 ഓഗസ്റ്റ് മുതൽ 1959 നവംബർ വരെ ഒരു വർഷത്തിനിടയിൽ യുഎസും സോവിയറ്റ് യൂണിയനും 14 ദൗത്യങ്ങൾ നടത്തി. ഇതിൽ മൂന്നെണ്ണം മാത്രമാണ് (ലൂണ 1, ലൂണ 2, ലൂണ 3) വിജയിച്ചത്. എല്ലാം സോവിയറ്റ് യൂണിയന്റെ ദൗത്യങ്ങളായിരുന്നു. 1964 ജൂലൈയിൽ യുഎസ് വിക്ഷേപിച്ച റേഞ്ചർ 7 ആണ് ചന്ദ്രന്റെ ക്ലോസപ്പ് ചിത്രങ്ങൾ ആദ്യമായി എടുത്തത്.
ഈ കണക്കുകളെല്ലാം നോക്കുമ്പോൾ ഇന്ത്യയുടെ ചന്ദ്രയാൻ–1, ചന്ദ്രയാൻ–2 ദൗത്യങ്ങളെല്ലാം വൻ വിജയമാണെന്ന് വ്യക്തമാകും. ചന്ദ്രയാൻ രണ്ടിൽ മൂന്നു ദൗത്യങ്ങളാണ് ഉണ്ടായിരുന്നത്, ഓർബിറ്റർ, ലാൻഡർ, റോവർ. ഇതിൽ 95 ശതമാനം ദൗത്യങ്ങളും വിജയിച്ചുവെന്നാണ് വിദേശ ഗവേഷകര്‍ വരെ പറഞ്ഞത്.
