സ്വാതന്ത്ര്യദിനത്തിൽ നേടിയത് മികച്ച കോൺസ്റ്റബിളിനുള്ള പുരസ്കാരം. പിറ്റേന്ന് തന്നെ കൈക്കൂലിക്കേസില്‍ പിടിയിൽ. തെലങ്കാനയിലെ മെഹ്ബൂബ് നഗർ ഐ ടൗൺ പൊലിസ് സ്റ്റേഷനിലെ സിവിൽ പൊലിസുകാരന്‍ തിരുപതി റെഡ്ഡിയാണ് സമൂഹത്തെ ഞെട്ടിച്ചുക്കളഞ്ഞത്.
ലൈസൻസുള്ള മണൽകടത്തുകാരനോട് 17000രൂപ കൈക്കൂലിയായി ചോദിച്ച് ഭീഷണിപ്പെടുത്തിയിരുന്നു. പണം നൽകിയില്ലെങ്കിൽ മണൽ ട്രാക്ടർ പിടിച്ചെടുക്കുമെന്നും തിരുപതി ഭീഷണിപ്പെടുത്തി. ശല്യം സഹിക്കവയ്യാതായതോടെ മണൽകടത്തുകാരൻ വിജിലൻസിനെ സമീപിക്കുകയായിരുന്നു. വിജിലൻസ് നൽകിയ 17000 രൂപ വാങ്ങുന്നതിനിടെയാണ് തിരുപ്പതി അറസ്റ്റിലായത്.
സ്വാതന്ത്ര്യദിനത്തിലാണ് തിരുപ്പതി എക്സൈസ് മന്ത്രി ശ്രീനിവാസ് ഗൗഡയിൽ നിന്ന്മ മികച്ച കോണ്‍സ്റ്റബിളിനുളള പുരസ്കാരം ഏറ്റുവാങ്ങിയത്. കോടതിയിൽ ഹാജരാക്കിയ തിരുപ്പതിയിപ്പോൾ റിമാൻഡിലാണ്. ഏതായാലും തിരുപ്പതിയുടെ കഥ കേട്ട മന്ത്രി ശ്രീനിവാസ് ഗൗഡയുൾപ്പടെ മൂക്കത്ത് വിരൽ വച്ച് പോവുകയാണ്..
