ഖത്തര് ആഭ്യന്തര മന്ത്രാലയത്തിലെ സാമ്പത്തിക-ഇലക്ട്രോണിക് കുറ്റകൃത്യ പ്രതിരോധ വകുപ്പിന്റെ ആറ് മണിക്കൂര് നീണ്ട രഹസ്യ നീക്കത്തിലൂടെ അറസ്റ്റിലായത് വന് സാമ്പത്തിക തട്ടിപ്പ് നടത്തിയ 31 അംഗ സംഘം. എസ്എംഎസ് സന്ദേശത്തിലൂടെ വ്യക്തിഗത വിവരങ്ങള് കൈക്കലാക്കി ഒരു കോടി റിയാലിന്റെ സാമ്പത്തിക തട്ടിപ്പ് നടത്തിയ 30 അംഗ സംഘത്തെ സാമ്പത്തിക-ഇലക്ട്രോണിക് കുറ്റകൃത്യ പ്രതിരോധ വകുപ്പിലെ പ്രത്യേക അന്വേഷണ സംഘമാണ് പിടികൂടിയത്. പലരില് നിന്നായാണ് 1 കോടി റിയാലില് അധികം തുക പ്രതികള് തട്ടിയെടുത്തത്. കഴിഞ്ഞ 2 വര്ഷത്തിനിടെ 4,000 സിം കാര്ഡുകള് ആണ് ഇതിനായി ഉപയോഗിച്ചത്. ഇക്കാലയളവില് രാജ്യത്ത് 960 ഓളം എസ്എംഎസ് സാമ്പത്തിക തട്ടിപ്പ് കേസുകളാണ് റിപ്പോര്ട്ട് ചെയ്തത്.
ബാങ്കുകള് ഉള്പ്പെടെയുള്ള പ്രശസ്ത സ്ഥാപനങ്ങളുടെ പേരില് വ്യക്തികള്ക്ക് വ്യാജ എസ്എംഎസ് അയക്കുകയും വിശ്വാസ്യത നേടിയ ശേഷം അവരുടെ ബാങ്ക് അക്കൗണ്ട്, ഓണ്ലൈന് ബാങ്കിങ് പാസ് വേര്ഡ്, ക്രെഡിറ്റ് കാര്ഡ് നമ്പര് എന്നിവ ഉള്പ്പെടെയുള്ള വ്യക്തിഗത വിവരങ്ങള് ശേഖരിക്കുകയും തുടര്ന്ന് അക്കൗണ്ടുകളിലെ പണം രാജ്യത്തിന് പുറത്തെ തട്ടിപ്പ് സംഘത്തിന്റെ കൂട്ടാളികളുടെ അക്കൗണ്ടുകളിലേക്ക് മാറ്റുകയുമാണ് ചെയ്യുന്നത്. പണം നഷ്ടപ്പെടുമ്പോഴാണ് തട്ടിപ്പിനിരയായ വിവരം വ്യക്തികള് അറിയുന്നത്.
സിം കാര്ഡുകള് ട്രാക്ക് ചെയ്ത് നീക്കങ്ങള് രഹസ്യമായി നിരീക്ഷിച്ചാണ് 6 മണിക്കൂര് നീണ്ട രഹസ്യ നീക്കത്തിലൂടെ അന്വേഷണസംഘം പ്രതികളെ പിടികൂടിയത്. ക്രിമിനല് ഇന്വെസ്റ്റിഗേഷന് വകുപ്പിന്റെ സഹകരണത്തിലായിരുന്നു അറസ്റ്റ്. പ്രതികളെ കൂടുതല് നിയമ നടപടികള്ക്കായി പബ്ലിക് പ്രോസിക്യൂഷന് കൈമാറി. തട്ടിപ്പ് സംഘത്തിന്റെ കൂട്ടാളികള് രാജ്യത്തിന് പുറത്തുമുണ്ട്.
രാജ്യത്ത് എസ്എംഎസ് തട്ടിപ്പുകള് വര്ധിച്ച സാഹചര്യത്തിലാണ് സാമ്പത്തിക-ഇലക്ട്രോണിക് ക്രൈം പ്രതിരോധ വകുപ്പിന്റെ നേതൃത്വത്തില് പ്രത്യേക അന്വേഷണ സംഘത്തെ രൂപീകരിച്ചത്. അപരിചിതരായ വ്യക്തികള്ക്ക് ബാങ്ക് വിവരങ്ങള് ഉള്പ്പെടെയുള്ള വ്യക്തിഗത വിവരങ്ങള് കൈമാറരുതെന്ന് ആഭ്യന്തര മന്ത്രാലയം അധികൃതര് ആവര്ത്തിച്ച് മുന്നറിയിപ്പ് നല്കിയിട്ടും ഇത്തരം തട്ടിപ്പ് സംഘങ്ങളുടെ ചതിയില് വീഴുന്നവര് ഏറെയാണ്.