നാട്ടിലേയ്ക്ക് പോകുന്നതിന്റെ തലേദിവസം പെട്ടികൾ കെട്ടിവെച്ച് ഉറങ്ങിയ പ്രവാസി ഉറക്കത്തിൽ മരിച്ചു. തിരുവനന്തപുരം വർക്കല പെരുമാതുറ സ്വദേശി അക്കരവിള പണയിൽ വീട് ഷാജി(48)യ്ക്കാണ് ഈ ദുരന്തമുണ്ടായത്. സൗദിയിലെ ഉനൈസയിൽ ഒരു കമ്പനിയിലെ ജീവനക്കാരനായി കഴിഞ്ഞ 13 വർഷമായി ജോലി ചെയ്ത് വരികയായിരുന്നു. വ്യാഴാഴ്ച രാവിലെ 11.05 ന്റെ വിമാനത്തിൽ നാട്ടിലേയ്ക്ക് പോകാനിരുന്നതായിരുന്നു.
രാവിലെ ഏറെ വൈകിയും മൊബൈലിൽ ലഭിയ്ക്കാത്തതിനെ തുടർന്നുള്ള അന്വേഷണത്തിലാണ് മുറിയിൽ മരിച്ചു കിടക്കുന്നതായി കണ്ടെത്തിയത്. ഉറക്കത്തിലെ ഹൃദയാഘാതമാണ് മരണകാരണമെന്ന് കരുതുന്നു. സന്ദർശന വീസയിലുണ്ടായിരുന്ന കുടുംബം മൂന്നാഴ്ച മുമ്പാണ് നാട്ടിലേക്ക് പോയത്. മൃതദേഹം സൗദിയിൽ മറവു ചെയ്യുമെന്ന് ബന്ധുക്കൾ അറിയിച്ചു. പിതാവ്: പരേതനായ സൈനുദ്ദീൻ, മാതാവ്: സഫാറ, ഭാര്യ: റൂബി, മക്കൾ: സൗമ്യ (21), ആദിൽ(17).
