ഈ വർഷത്തെ ഹജ്ജ് തീർഥാടകരെ സ്വീകരിക്കാനൊരുങ്ങി സൗദി അറേബ്യ. ഇന്ത്യയിൽ നിന്നുള്ള തീർഥാടകരുടെ ആദ്യ സംഘം അടുത്തമാസം നാലിനു മദീനയിലെത്തും. കേരളത്തിൽനിന്നുള്ള തീർഥാടകരുമായി ആദ്യവിമാനം ഏഴിന് പുറപ്പെടും.
420 ഹജ്ജ് തീർഥാടകരുമായി ഡൽഹിയിൽനിന്നും എയർ ഇന്ത്യ വിമാനം അടുത്തമാസം നാലിന് മദീന രാജ്യാന്തരവിമാനത്താവളത്തിലെത്തും. സൗദിയിലെ ഇന്ത്യൻ അംബാസഡർ ഔസാഫ് സയീദ്, ജിദ്ദ ഇന്ത്യൻ കോൺസുൽ ജനറൽ മുഹമ്മദ് നൂർ ഷെയ്ഖ്, എംബസി ഉദ്യോഗസ്ഥർ, ഇന്ത്യൻ ഹജ്ജ് മിഷൻ ഉദ്യോഗസ്ഥർ തുടങ്ങിയവരും മദീനയിലെ സന്നദ്ധപ്രവർത്തകരും ചേർന്ന് തീർഥാടകരെ സ്വീകരിക്കും.
കേരളത്തിൽനിന്നുള്ള ഹജ്ജ് തീർഥാടകരും ഇത്തവണ മദീനയിലാണെത്തുന്നത്. അടുത്തമാസം ഏഴിന് കോഴിക്കോടുനിന്നുള്ള സൗദി എയർലൈൻസിലെത്തുന്ന തീർഥാടകരെ പ്രവാസിമലയാളികളായ സന്നദ്ധപ്രവർത്തകരടക്കമുള്ളവർ ചേർന്നു സ്വീകരിക്കും. എയർ ഇന്ത്യ, സൗദി എയർലൈൻസ്, സ്പൈസ് ജെറ്റ് എന്നീ വിമാനങ്ങളിലായിരിക്കും ഇന്ത്യയിൽനിന്നുള്ള തീർഥാടകരെത്തുന്നത്. കൊച്ചി, കോഴിക്കോട് വിമാനത്താവളങ്ങളിൽനിന്നായി പതിനെട്ട് സർവീസുകളാണ് ഹജ്ജ് തീർഥാടകർക്കായി ഒരുക്കിയിരിക്കുന്നത്.
