ദുബായ് : രാജ്യാന്തര ക്രിക്കറ്റിന്റെ നിലവാരം കുത്തനെ ഇടിഞ്ഞുവെന്ന് മുൻ ഇന്ത്യൻ ക്രിക്കറ്റ് ടീം ഓൾ റൗണ്ടർ റോബിൻ സിങ്. യുഎഇ യിൽ 'ആര്‍എസ് സ്പോർട്സ് അക്കാദമി' ആരംഭിക്കുന്നതുമായി ബന്ധപ്പെട്ടു ദുബായിൽ വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.
ക്രിക്കറ്റിൻ്റെ ആവേശം മുഴുവൻ ട്വന്റി 20 യിലേയ്ക്ക് താഴ്ന്നുപോയിരിക്കുന്നു. നിലവിലെ മികച്ച ടീം ഇന്ത്യയുടേതാണെന്നു പറയുമ്പോൾ മറ്റു ടീമുകളുടെ അവസ്ഥ നോക്കണം. ശ്രീലങ്ക ഇന്ത്യക്കു മുന്നിൽ ഇത്ര ദാരുണമായി അടിയറവു പറയുമെന്ന് കരുതിയില്ല. ട്വന്റി20 അടക്കം ഒട്ടേറെ ടൂർണമെന്റുകളിൽ കളിക്കാർക്ക് പങ്കെടുക്കേണ്ടി വരുന്നത് നിലവാരത്തെ ബാധിക്കുന്നു.
ഫാസ്റ്റ് ബൗളർമാരാണ് ഏറ്റവും വിലകൊടുക്കേണ്ടി വരുന്നത്. യുഎഇയുടെ വിവിധ ഭാഗങ്ങളിൽ പരിശീലന കേന്ദ്രങ്ങൾ ആരംഭിക്കുമെന്നും പരിശീലനത്തിന് പ്രായം ഘടകമല്ലെന്നും റോബിൻസിങ് പറഞ്ഞു. അൽ നജാഹ് എജ്യുക്കേഷൻ ആണ് സ്പോർട്സ് അക്കാദമിക്ക് അടിസ്ഥാന സൗകര്യം ഒരുക്കുന്നത്.
ഐ പി എൽ അടക്കമുള്ള ടൂർണമെന്റുകളിൽ യു എ ഇ യിൽ നിന്നുള്ളവരെ പങ്കെടുപ്പിക്കുന്നതിന് പാകത്തിൽ ഉള്ള പരിശീലനം ആണ് വിഭാവനം ചെയ്തിരിക്കുന്നത്. യു എ ഇ യിൽ താമസിച്ചു മുഴുവൻ സമയവും അക്കാദമിയുടെ മേൽനോട്ടം വഹിക്കുമെന്നും കൂട്ടിച്ചേർത്തു.
