പക്വതയില്ലായ്മ കാരണം ചെയ്ത തെറ്റിന് സലീം കുമാറിനോട് മാപ്പ് ചോദിച്ച് നടി ജ്യോതി കൃഷ്ണ. ഫെയ്സ്ബുക്ക് വിഡിയോയിലൂടെയാണ് ജ്യോതി കൃഷ്ണ മാപ്പ് ചോദിക്കുന്നത്. സോറി ചലഞ്ചിന്റെ ഭാഗമായിട്ടാണ് ഇപ്പോൾ നടി സലീം കുമാറിനോട് മാപ്പ് ചോദിക്കുന്നത്.
ജീവിതത്തിൽ എപ്പോഴെങ്കിലും ഒരു സോറി പറഞ്ഞാൽ തീരാവുന്ന പ്രശ്നമേയുണ്ടായിരുന്നുള്ളു എന്ന് തോന്നുകയും ചില പ്രശ്നങ്ങൾ കൊണ്ട് അകന്നു പോയവരെ തിരിച്ചു പിടിക്കാൻ പറ്റിയിരുന്നെങ്കിൽ എന്ന് തോന്നിയവരോടും മടിക്കാതെ സോറി പറഞ്ഞ് ജീവിതത്തിലേക്ക് തിരികെ കൊണ്ടുവരണമെന്ന് പറയുകയാണ് ജ്യോതി കൃഷ്ണ.
അങ്ങനെ തനിക്ക് ആദ്യം സോറി പറയണമെന്ന് തോന്നുന്നത് നടൻ സലിം കുമാറിനോടാണ് എന്നും മൂന്നാം നാൾ ഞായറാഴ്ചയുടെ സെറ്റിൽ വെച്ച് പ്രശ്നമുണ്ടായെന്നും തുറന്ന് പറയുകയാണ് നടി. അന്ന് പക്വതയില്ലായ്മ കൊണ്ട് എന്തൊക്കെയോ തിരിച്ചു പറഞ്ഞെന്നും ഇപ്പോൾ എല്ലാത്തിനും ക്ഷമ ചോദിക്കണമെന്ന് തോന്നിയെന്നും ജ്യോതി കൃഷ്ണ പറയുന്നു. അന്ന് സെറ്റിൽ നിന്ന് എല്ലാവരോടും യാത്ര പറഞ്ഞ് ഇറങ്ങിയപ്പോൾ സലിം കുമാർ ചേട്ടനോട് പറഞ്ഞില്ലെന്നും അന്ന് അങ്ങനെ തോന്നിയില്ലെന്നും ജ്യോതി.
എന്നാൽ പിന്നീട് ഞാൻ ചെയ്തത് ശരിയായില്ല എന്ന് അദ്ദേഹം പറഞ്ഞതായി അറിഞ്ഞുവെന്നും അദ്ദേഹവുമായി പിന്നീട് സംസാരിച്ചിട്ടുണ്ടെങ്കിലും ഒരു സോറി പറയാൻ പറ്റിയിരുന്നില്ലെന്നും ഈ അവസരം അതിനായി വിനിയോഗിക്കുന്നെന്നും സോറി ചലഞ്ചിൻ്റെ ഭാഗമായി ജ്യോതി കൃഷ്ണ പങ്കുവെച്ച വീഡിയോയിൽ പറഞ്ഞു. തന്റെ അമ്മയോടും, ഒരു സഹപാഠിയോടും നടി മാപ്പ് പറയുന്നുണ്ട്.
