കഴിഞ്ഞ ഒരാഴ്ചയായി വാർത്താ തലക്കെട്ടുകളിൽ നിറഞ്ഞുനിൽക്കുകയാണ് ദീപിക പദുക്കോണും രൺവീർ കപൂറും. മണിക്കൂറുകൾ നീണ്ട കാത്തിരിപ്പിനൊടുവിലാണ് താരദമ്പതികളുടെ ആദ്യവിവാഹ ചിത്രങ്ങളെത്തിയത്. മുബൈ എയർപോർട്ടിൽ വിമാനമിറങ്ങി കാറിനടുത്തേക്ക് നടക്കുന്നതിനിടെ ദീപികയെ ചേർത്തുപിടിക്കുന്ന രൺവീറിൻറെ ചിത്രമാണ് ഇപ്പോൾ വൈറലാകുന്നത്.
വിമാനത്താവളത്തിലെ തിരിക്കിനിടയിലാണ് ദീപികയ്ക്കു സംരക്ഷണമേകുന്ന ഭർത്താവായി രൺവീർ മാറിയത്. ദൃശ്യങ്ങൾ കാമറകൾ ഒപ്പിയെടുത്തു. മുംബൈ വിമാനത്താവളത്തിലെത്തിയ ഇരുവരും ആരാധകരെ കൈവീശിയും കൈകൂപ്പിയും അഭിവാദ്യം ചെയ്തു. ഖാറിലുള്ള രൺവീറിന്റെ വീട്ടിലേക്കാണ് യാത്രയായത്.
തിരക്കിനിടയിൽ ദീപികയുടെ സംരക്ഷണം രൺവീർ ഏറ്റെടുത്ത കാഴ്ച ആരാധകർക്ക് ഇരട്ടി മധുരമായി. നവദമ്പതികളായി തിരച്ചെത്തുന്ന താരങ്ങളെ സ്വീകരിക്കാൻ നിരവധി ആരാധകരും മാധ്യമങ്ങളുമാണ് മുംബൈ വിമാനത്താവളത്തിൽ കാത്തുനിന്നത്.
സബ്യസാചി ഡിസൈൻ ചെയ്ത ഓഫ് വൈറ്റ് സിൽക് സ്യൂട്ടായിരുന്നു ദീപികയുടെ വേഷം. ചുവപ്പും സ്വർണ നിറവും കലര്‍ന്ന ദുപ്പട്ടയും ദീപിക ധരിച്ചിരുന്നു. സന്തോഷവാനായി കാണപ്പെട്ട രൺവീർ തന്റെ പതിവ് ചിരി തുടർന്നു. ഓഫ് വൈറ്റിലുള്ള ചുരിദാർ കുർത്തയായിരുന്നു രൺവീറിന്റെ വേഷം. ഇതിനൊപ്പം പിങ്ക് നിറത്തിലുള്ള ജാക്കറ്റും ധരിച്ചിരുന്നു.
വീട്ടിലെത്തിയ ഇവരുടെ ചിത്രങ്ങൾ ഡിസൈനർ സബ്യസാചി ഇൻസ്റ്റഗ്രാമിലൂടെ പങ്കുവെച്ചു. നവംബർ 14, 15 തീയതികളിൽ ഇറ്റലിയിലെ ലേക് കോമോയിൽ സിന്ധ്, കൊങ്ങിണി ആചാരപ്രകാരം നടന്ന ഇവരുടെ വിവാഹത്തിനും വസ്ത്രങ്ങളൊരുക്കിയത് സബ്യസാചിയായിരുന്നു.
രണ്ട് സത്കാരപരിപാടികളാണ് ദീപികയും രണ്‍വീറും ഒരുക്കുന്നത്. ദീപികയുടെ സ്വദേശമായ ബെംഗളൂരുവിലാണ് ആദ്യത്തേത്. ഇതിനുശേഷം ഡിസംബർ 1ന് മുംബൈയിൽ സത്കാരം സംഘടിപ്പിക്കും. സിനിമാ മേഖലയിലെ സുഹൃത്തുക്കളും പ്രമുഖ വ്യക്തികളും ഈ സത്കാരത്തിൽ പങ്കെടുക്കും.
