‘സത്യമാണ്, ഞാൻ അവരെ കെട്ടിപ്പിടിച്ച് ചുംബിക്കാൻ ശ്രമിച്ചിട്ടുണ്ട്...’ ഗായിക ചിന്മയിയുടെ മീ ടൂ ആരോപണം ശരിവെച്ച് സംഗീത സംവിധായകൻ രഘു ദീക്ഷിത്. തന്റെ തെറ്റിന് മാപ്പ് പറഞ്ഞിട്ടുണ്ടെന്നും ഉന്നയിച്ച ആരോപണങ്ങള്‍ ഒന്നും തന്നെ എതിര്‍ക്കുന്നില്ലെന്നും രഘു തുറന്നുപറഞ്ഞു.
തന്റെ ഭാഗത്ത് നിന്നും മോശം പെരുമാറ്റമുണ്ടായപ്പോൾ ചിന്മയി അത് തടയുകയും അവിടെ നിന്ന് ഓടി പോകുകയും ചെയ്തു. പിന്നീട് എനിയ്ക്ക് അവര്‍ ഒരു സന്ദേശം അയച്ചിരുന്നു. താന്‍ ചെയ്തത് ശരിയല്ലെന്ന് പറഞ്ഞ്. അപ്പോള്‍ തന്നെ അവരോട് മാപ്പ് പറയുകയും ചെയ്തിരുന്നു.
സംഭവം നടക്കുമ്പോള്‍ ഞാനും ഭാര്യയുമായി അത്ര നല്ല ബന്ധത്തില്‍ അല്ലായിരുന്നു. ഞങ്ങളുടെ ബന്ധം മോശപ്പെട്ടു വരുകയായിരുന്നു. അതിലൂടെ ഞാന്‍ ആശ്വാസം കണ്ടെത്താന്‍ ശ്രമിക്കുകയായിരുന്നു. കഴിഞ്ഞ മൂന്ന് വര്‍ഷമായി ഞാനും ഭാര്യയും തമ്മില്‍ പിരിഞ്ഞ് താമസിക്കുകയാണ്. വിവാഹ മോചനം അന്തിമഘട്ടത്തില്‍ നില്‍ക്കുകയാണ്. ഈ അവസരത്തില്‍ എന്റെ മുന്‍ ഭാര്യയോട് മാപ്പ് ചോദിക്കുന്നതായും രഘു ദക്ഷിത് പറഞ്ഞു. സിനിമയില്‍ അവസരം കൊടുക്കാമെന്ന് പറഞ്ഞ് ഞാന്‍ ആരെയും ലൈംഗികമായി ഉപദ്രവിച്ചിട്ടില്ലെന്നും ദീക്ഷിത് കൂട്ടിച്ചേര്‍ത്തു.
