ബിഷപ്പ് നേരത്തെ സ്ഥാനം ഒഴിയേണ്ടതായിരുന്നു, വിശ്വാസികള്‍ക്ക് അപമാനം:കെ.ആര്‍.എല്‍.സി.സി

ബിഷപ് ഫ്രാങ്കോ മുളയ്ക്കല്‍ നേരത്തെ സ്ഥാനമൊഴിയേണ്ടതായിരുന്നുവെന്ന് ലത്തീന്‍ സഭാ അല്‍മായ സംഘടന. വ്യക്തിപരമായ ആരോപണങ്ങള്‍ക്ക് സഭയെ കൂട്ടുപിടിക്കരുതെന്ന്  കേരള റീജിയന്‍ ലാറ്റിന്‍ കാത്തലിക് കൗണ്‍സില്‍ ആവശ്യപ്പെട്ടു. ബിഷപ്പിന്റെ അറസ്റ്റ് ആവശ്യപ്പെട്ട് കൊച്ചിയിലെ സമരത്തിനൊപ്പം തിരുവനന്തപുരത്തും ജലന്തറിലെ സഭാ ആസ്ഥാനത്തും പ്രതിഷേധം നടന്നു. സന്യാസിനി സമൂഹത്തില്‍ നിന്ന് പുറത്താക്കിയാലും സമരം തുടരുമെന്ന് കന്യാസ്ത്രീകള്‍ വ്യക്തമാക്കി. ബിഷപ്പിന്റെ അറസ്റ്റ് ഉടന്‍വേണമെന്ന് ബി.ജെ.പി കേന്ദ്ര നേതൃത്വം ആവശ്യപ്പെട്ടു. 

ജലന്തര്‍ ബിഷപ്പുമായി ബന്ധപ്പെട്ട് ഇപ്പോഴുണ്ടായ സംഭവവികാസങ്ങള്‍ വിശ്വാസികള്‍ക്ക് അപമാനമാണെന്നാണ്  കേരള റീജിയന്‍ ലാറ്റിന്‍ കാത്തലിക് കൗണ്‍സിലിന്റെ നിലപാട്. ബിഷപിന്റെ ധാര്‍മിക ബോധം ചോദ്യം ചെയ്യപ്പെട്ടിരിക്കുന്നു. ബിഷപിന്റെ നടപടികള്‍ കത്തോലിക്കാ സഭയുടെ ദര്‍ശനങ്ങള്‍ക്ക് വിരുദ്ധമാണെന്നും കെ.ആര്‍.എല്‍.സി.സി വ്യക്തമാക്കി. അതിനിടെ  ബിഷപ്പിന്റെ അറസ്റ്റ് ആവശ്യപ്പെട്ടുളള കന്യാസ്ത്രീമാരുടെ സമരം അഞ്ചാംദിവസത്തിലേക്ക് കടന്നു. സഭ പുറത്താക്കിയാലും നീതികിട്ടുംവരെ സമരം തുടരുമെന്ന് കന്യാസ്ത്രീകള്‍ അറിയിച്ചു.

കന്യാസ്ത്രീകള്‍ക്ക് പിന്തുണയുമായി രാഷ്ട്രീയ, സാമൂഹ്യ, സാംസ്കാരിക രംഗത്തെ പ്രമുഖർ  മേഖലകളില്‍ നിന്ന് ഒട്ടേറെപ്പേര്‍ ഇന്ന് കൊച്ചിയിലെ  സമരവേദിയിലെത്തി. സിനിമയിലെ സ്ത്രീകളുടെ കൂട്ടായ്മയായ ഡബ്ള്യു. സി.സി കന്യാസ്ത്രീകള്‍ക്ക് പിന്തുണ അറിയിച്ചു.

കൊച്ചിയിലെ സമരത്തിന് പിന്തുണയുമായി തിരുവനന്തപുരത്ത് ജനകീയ കൂട്ടായ്മ നടത്തിയ ധര്‍ണ   വി.എം. സുധീരൻ ഉദ്ഘാടനം ചെയ്തു. കേസ് അട്ടിമറിച്ചത് ഡി.ജി.പിയും ഐ.ജിയും ചേർന്നാണന്നുംവി.എം സുധീരന്‍ ആരോപിച്ചു. ബിഷപ്പിന്റെ അറസ്റ്റ് ആവശ്യപ്പെട്ട ബി.ജെ.പി കേന്ദ്ര നേതൃത്വം ബിഷപ്പിനെ പിന്തുണയ്ക്കുന്നവരെ ബഹിഷ്കരിക്കാന്‍ വിശ്വാസികള്‍ തയ്യാറാവണമെന്ന് ആവശ്യപ്പെട്ടു.

ജലന്തറില്‍ ആര്‍.എം.പി വനിത ഫെഡറേഷന്റെ നേതൃത്വത്തില്‍ രൂപതാ ആസ്ഥാനത്തേക്ക് നടന്ന മാര്‍ച്ച് പൊലീസ് തടഞ്ഞു. കൂടുതല്‍ പ്രതിഷേധങ്ങള്‍ക്കുളള സാധ്യത കണക്കിലെടുത്ത് ബിഷപ് ഹൗസിന് പഞ്ചാബ് പൊലീസ് സുരക്ഷ ശക്തമാക്കി. അതേ സമയം കന്യാസ്ത്രീകൾ നടത്തുന്ന സമരത്തോട് സഹകരിക്കരുതെന്ന് നിർദേശം നൽകി സി. എം.സി സിസ്റ്റേഴ്സിന് സുപ്പീരിയർ ജനറൽ  സർക്കുലർ നല്‍കി.

കുറ്റം തെളിയുന്നതുവരെ നിരപരാധി; ബിഷപ്പിനെ പിന്തുണച്ച് ചങ്ങനാശേരി സഹായമെത്രാന്‍

ജലന്തര്‍ ബിഷപ്പ് ഫ്രാങ്കോ മുളയ്ക്കലിനെ പിന്തുണച്ച് ചങ്ങനാശേരി സഹായമെത്രാന്‍ . കുറ്റം തെളിയുന്നതുവരെ നിരപരാധിയെന്ന് കരുതണമെന്ന് മാര്‍ തോമസ് തറയില്‍ ആവശ്യപ്പെട്ടു. ആരോപിതന്‍ മെത്രാനോ വൈദികനോ ആയാല്‍ ഇവിടെ സ്ഥിതി മറിച്ചാണ്. അന്വേഷണവും വിചാരണയും കഴിയാതെ കുറ്റവാളിയെ പ്രഖ്യാപിക്കുന്നത് കേരളമോഡല്‍ ആണെന്നും  മാര്‍ തോമസ് തറയില്‍  വിമർശിച്ചു. 

ജലന്തര്‍ ബിഷപ്പിനെതിരായ പീഡനക്കേസിൽ പൊലീസ് നടപടികളെ ന്യായീകരിച്ച് സിപിഎം കേന്ദ്രനേതൃത്വം രംഗത്തെത്തി.  അന്വേഷണം ശരിയായ ദിശയിലാണെന്നും മറിച്ചുള്ള കന്യാസ്ത്രീകളുടെ ആരോപണം അടിസ്ഥാന രഹിതമാണെന്നും സിപിഎം പൊളിറ്റ് ബ്യൂറോ അംഗം എസ്. രാമചന്ദ്രന്‍ പിള്ള ഡല്‍ഹിയില്‍ പറഞ്ഞു. 

ഗൂഢാലോചനയെന്ന നിലപാടിൽ ജലന്തര്‍ രൂപത

ആരോപണങ്ങള്‍ ‍ഗൂഢാലോചനയെന്ന നിലപാടിലാണ് ജലന്തര്‍ രൂപത. കന്യാസ്ത്രീയുടെ മൊഴികളില്‍ വൈരുദ്ധ്യമുണ്ടെന്നും  രൂപതയേയും ബിഷപ്പിനേയും ഇല്ലായ്മ ചെയ്യാനാണ് ശ്രമമെന്നും രൂപത പുറത്തിറക്കിയ വാര്‍ത്താക്കുറിപ്പില്‍ ആരോപിച്ചു. കുറ്റം തെളിയും വരെ മാധ്യമവിചാരണ ഒഴിവാക്കണമെന്നും ആവശ്യപ്പെടുന്നുണ്ട്. 

ജലന്തര്‍ ബിഷപ്പ് ഫ്രാങ്കോ മുളയ്ക്കലിനെതിരെ കുറവിലങ്ങാട് നാടുകുന്ന് മഠത്തിലെ കന്യാസ്ത്രീ പരാതി നല്‍കിയിട്ട് 77 ദിവസം പിന്നിടുന്നു. ബിഷപ്പിനെ അറസ്റ്റ് ചെയ്യാത്തതില്‍ കോടതിയുടെ വിമര്‍ശനവും നാടെങ്ങും ഉയരുന്ന പ്രതിഷേധവുമാണ് അന്വേഷണ സംഘത്തിന്‍റെ ഇന്നത്തെ യോഗം നിര്‍ണായകമാക്കുന്നത്. ഐജി വിജയ് സാക്കറെയുടെ നേതൃത്വത്തില്‍ ചേരുന്ന യോഗത്തില്‍ ബിഷപ്പിനെ സംരക്ഷിക്കാനുള്ള ഇടപെടലുകള്‍ ഉണ്ടാകില്ലെന്ന് പ്രതീക്ഷിക്കാം. 

മൊഴിയിലെ വൈരുദ്ധ്യവും അന്വേഷണ സംഘം ശേഖരിച്ച തെളിവുകളും ബിഷപ്പിനെ ഇത്തവണ കുരുക്കിലാക്കും.‌ 2014, 16 കാലഘട്ടത്തില്‍ ഫ്രാങ്കോ മുളയ്ക്കല്‍ 13 തവണ പീഡിപ്പിച്ചുവെന്നായിരുന്നു കന്യാസ്ത്രീയുടെ പരാതി. വൈക്കം ഡിവൈഎസ്പിയുടെ നേതൃത്വത്തില്‍ വിശദമായ അന്വേഷണം നടന്നു. കന്യാസ്ത്രീ, ബിഷപ്പ്, കര്‍ദിനാള്‍ ഉള്‍പ്പെടെ ഒരു ഡസനിലേറെ പേരുടെ മൊഴിയെടുത്തു.  കന്യാസ്ത്രീയുടെ രഹസ്യമൊഴിക്ക് പുറമെ നാടുക്കുന്ന് മഠത്തിലെ സന്ദര്‍ശക റജിസ്റ്റര്‍, വൈദ്യ പരിശോധന റിപ്പോര്‍ട്ട് ഉള്‍പ്പെടെ ബിഷപ്പിനെ കുരുക്കിലാക്കുന്ന തെളിവുകളും കണ്ടെത്തി. 

കന്യാസ്ത്രീയെ അറിയില്ലെന്നും പീഡനം നടന്ന മഠത്തില്‍ താമസിച്ചിട്ടില്ലെന്ന ബിഷപ്പിന്‍റെ മൊഴി കുരുക്കു മുറുക്കി. അന്വേഷണം ക്രൈംബാഞ്ചിന് വിട്ട് അന്വേഷണം അട്ടിമറിച്ച് ബിഷപ്പിനെ രക്ഷിക്കാനും ശ്രമം നടന്നു. മനോരമ ന്യൂസ് വാര്‍ത്തയെ തുടര്‍ന്ന് പ്രതിഷേധം ഉയര്‍ന്നതോടെ അന്വേഷണ സംഘം വിപുലീകരിച്ച് പൊലീസ് തടിതപ്പി. അന്വേഷണം പൂര്‍ത്തിയായതായി ജില്ലാ പൊലീസ് മേധാവി കഴിഞ്ഞ ദിവസം സ്ഥിരീകരിച്ചു. 

കന്യാസ്ത്രീയൂടെ പരാതിയില്‍ എന്ത് നടപടി സ്വീകരിച്ചുവെന്ന് ഹൈക്കോടതി കഴിഞ്ഞ ദിവസം ആരാഞ്ഞു. നടപടികള്‍ വിശദീകരിച്ചുള്ള മറുപടി നാളെ കോടതിയില്‍ നല്‍കണം. ബിഷപ്പിനെ ചോദ്യം ചെയ്യാനായി നോട്ടിസ് നല്‍കി മുഖം രക്ഷിക്കാനാണ് പൊലീസിന്‍റെയും സര്‍ക്കാരിന്‍റെയും ശ്രമം. 

ഫ്രാങ്കോ മുളയ്ക്കലിനെ അറസ്റ്റ് ചെയ്യണമെന്നാവശ്യപ്പെട്ട് കൊച്ചിയില്‍ കന്യാസ്ത്രീകള്‍ നടത്തുന്ന സമരം അഞ്ചാംദിവസത്തിലേക്ക് കടക്കുകയാണ്. ഹൈക്കോടതി ജംഗ്ഷനില്‍ നടക്കുന്ന റിലേ നിരാഹാരസമരത്തോടനുബന്ധിച്ച് ഇന്ന് സാംസ്കാരിക സമ്മേളനവും സംഘടിപ്പിച്ചിട്ടുണ്ട്. സിനിമാ, സാഹിത്യമേഖലകളില്‍ നിന്നുള്ള പ്രമുഖര്‍ സാംസ്കാരിക സമ്മേളനത്തില്‍ പങ്കെടുക്കും. സംവിധായകന്‍ മേജര്‍ രവി, കവിയും നടനുമായ ബാലചന്ദ്രന്‍ ചുള്ളിക്കാട് തുടങ്ങിയവര്‍ കഴിഞ്ഞദിവസം സമരപ്പന്തലിലെത്തി കന്യാസ്ത്രീകള്‍ക്ക് പിന്തുണ പ്രഖ്യാപിച്ചിരുന്നു. ജോയിന്റ് ക്രിസ്ത്യന്‍ കൗണ്‍സില്‍ ഉള്‍പ്പെടെയുള്ള സംഘടനകളുടെ പിന്തുണയോടെയാണ് കന്യാസ്ത്രീകള്‍ സമരം നടത്തുന്നത്.