അവാര്‍ഡ് ദാന കമ്മിറ്റിയില്‍ നിന്ന് മുകേഷിനെ മാറ്റണം; സര്‍ക്കാരിനോട് ടി.ദീപേഷ്

Thumb Image
SHARE

സ്ത്രീ വിരുദ്ധ നിലപാട ് സ്വീകരിച്ച  അമ്മ സംഘടയുടെ  തലപ്പത്തിരിക്കുന്ന  നടൻ മുകേഷിനെ സംസ്ഥാന ചലച്ചിത്ര പുരസ്കാര ദാനച്ചടങ്ങിന്റെ സ്വാഗത സംഘം ചെയർമാൻ സ്ഥാനത്തുനിന്നു മാറ്റണമെന്നു  സംവിധായകൻ ടി. ദീപേഷ്. മുകേഷ്  സ്വാഗത സംഘം ചെയർമാനായ  ചടങ്ങിൽ വച്ച് സംസ്ഥാന ചലച്ചിത്ര പുരസ്കാരം സ്വീകരിക്കുന്നതിൽ  മാനസിക പ്രയാസമുണ്ടെന്നു കാണിച്ചു ദീപേഷ് സാംസ്കാരിക മന്ത്രിക്കു കത്തയച്ചു. 2017ലെ കുട്ടികളുടെ മികച്ച ചിത്രത്തിനുള്ള അവാർഡ് നേടിയ സ്വനം സിനിമയുടെ  സംവിധായകനാണു  ടി. ദീപേഷ്. കണ്ണൂരിലെ  സിപിഎം  കുടുംബത്തിൽനിന്നുള്ള സംവിധായകനാണു  സിപിഎം സഹയാത്രികനായ  എംഎൽഎയ്ക്കെതിരെ രംഗത്തു വന്നിരിക്കുന്നതെന്നതാണു  ശ്രദ്ധേയം. സാംസ്കാരിക  മന്ത്രിക്ക് അയച്ച കത്തിൽനിന്ന്: 

2017ലെ സംസ്ഥാന ചലച്ചിത്ര പുരസ്കാരം കൈമാറുന്നത് ഈ വർഷം കൊല്ലത്തു വച്ചാണെന്നും മുകേഷാണു സ്വാഗത സംഘം ചെയർമാനെന്നും അറിയാൻ കഴിഞ്ഞു. തികച്ചും ജനാധിപത്യ വിരുദ്ധവും സ്ത്രീ വിരുദ്ധവുമായ നിലപാട് സ്വീകരിച്ച അമ്മ എന്ന സംഘടനയുടെ  തലപ്പത്ത് ഇരിക്കുന്ന മുകേഷിന്റെ സ്വാഗതത്തിൽ, ജനങ്ങളുടെ നികുതിപ്പണം ഉപയോഗിച്ചു ള്ള അവാർഡ് സമ്മാനിക്കുന്നത് ഇടതുപക്ഷ മുന്നണിയും സർക്കാരും മുന്നോട്ടു വച്ചിട്ടുള്ള സ്ത്രീപക്ഷ നിലപാടിനു വിരുദ്ധമാണ്. ഇതു പൊതു സമൂഹത്തിനു മുൻപിൽ തെറ്റായ സന്ദേശം എത്തിക്കും. ഈ പരിപാടിയിൽ  പങ്കെടുത്ത് അവാർഡ് വാങ്ങേണ്ട ആൾ എന്ന നിലയിൽ വളരെ മാനസിക പ്രയാസമുണ്ട്. കഴിഞ്ഞ വർഷം തലശ്ശേരിയിൽ  സംഘടിപ്പിച്ച അവാർഡ് ദാന പരിപാടിയിൽ അവൾക്കൊപ്പം എന്നതായിരുന്നു പ്രധാന വിഷയം. മുകേഷിനെ മാറ്റി നിർത്തി ഇടതുപക്ഷത്തിന്റെ പ്രഖ്യാപിത നിലപാട് ഉയർത്തിപ്പിടിക്കണമെന്ന്  അഭ്യർഥിക്കുന്നു.

സിപിഎം നേതാവും കൂത്തുപറമ്പ് മുൻ നഗരസഭാ അധ്യക്ഷയുമായ സി.വി. മാലിനിയുടെ മകനാണു ദീപേഷ്. 2016ലും മികച്ച ബാലചിത്രത്തിനുള്ള  സംസ്ഥാന പുരസ്കാരം ദീപേഷിനായിരുന്നു.

MORE IN BREAKING NEWS
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.