കണ്ണൂർ ഇരിട്ടി നഗരസഭയിലെ മാലിന്യപ്രശ്നം പരിഹരിക്കണമെന്നാവശ്യപ്പെട്ട് നാട്ടുകാർ സമരത്തിനൊരുങ്ങുന്നു. അത്തിത്തട്ടിലെ മാലിന്യംതള്ളുന്ന കേന്ദ്രത്തിന് സമീപം താമസിക്കുന്നവരാണ് പ്രതിഷേധവുമായി രംഗത്തെത്തിയിരിക്കുന്നത്.
ചുറ്റുമതിൽ പോലുമില്ലാത്ത മാലിന്യ നിക്ഷേപ കേന്ദ്രം. ജൈവമാലിന്യങ്ങളും പ്ലാസ്റ്റിക്കുമെല്ലാം കുന്നുകൂട്ടിയിട്ടിരിക്കുന്നു. സംസ്കരിക്കാൻ സൗകര്യവുമില്ല. തെരുവുനായകൾ പ്രദേശം കൈയടക്കി കഴിഞ്ഞു. പ്ലാസ്റ്റിക് കൂട്ടിയിട്ട് കത്തിക്കുന്നതും പതിവാണ്. പ്രശ്ന പരിഹാരം തേടി നഗരസഭാ അധികൃതരെ സമീപിച്ചിട്ടും ഫലമുണ്ടായില്ല.
കലക്ടർക്ക് നിവേദനം നൽകി കാത്തിരിക്കുകയാണ് നാട്ടുകാർ. അശാസ്ത്രീയമായ മാലിന്യനിക്ഷേപം ആരോഗ്യപ്രശ്നക്കൾക്ക് കാരണമാകുന്നുവെന്നും ആക്ഷേപമുണ്ട്. നടപടിയുണ്ടായില്ലെങ്കിൽ അടുത്തദിവസംമുതൽ മാലിന്യ ലോറികൾ തടയാനാണ് നാട്ടുകാരുടെ തീരുമാനം.