കണ്ണൂര്-മൈസൂരു സംസ്ഥാനപാത ദേശീയപാതയാകുന്നതോടെ കണ്ണൂർ വിമാനത്താവളത്തിലേക്കുള്ള യാത്ര സുഗമമാകും. മൈസൂരുവിൽനിന്നും ഉത്തരമലബാറിൽനിന്നും വിമാനത്താവളത്തിലേക്കുള്ള പ്രധാന വഴിയായി നിർദിഷ്ട ദേശീയപാത മാറും.
കണ്ണൂര്-മൈസൂരു സംസ്ഥാനപാത ദേശീയപാതയാക്കുമെന്ന കേന്ദ്ര ഗതാതമന്ത്രിയുടെ പ്രഖ്യാപനത്തെ ഏറെ പ്രതീക്ഷയോടെയാണ് ജില്ല കാണുന്നത്. 190 കിലോമീറ്ററാണ് കണ്ണൂരിൽനിന്ന് മൈസൂരുവിലേക്കുള്ള ദൂരം. വളവുകള് നിവർത്തി റോഡിന് വീതി കൂട്ടുന്നതോടെ ദൂരം അൽപംകൂടി കുറയും. മൈസൂരുവിനിന്ന് റോഡ്മാര്ഗം കണ്ണൂർ വിമാനത്താവളത്തിൽ വേഗത്തിലെത്താമെന്നതാണ് ഈ പാതയുടെ ഏറ്റെവും വലിയ പ്രത്യേകത. വിമാനത്താവളത്തിലേക്കുള്ള ഗ്രീൻഫീൽഡ് റോഡിന്റെ പൂർത്തികരണം വൈകിയാല് ദേശീയപാതയെ പ്രധാന വഴിയായി ഉപയോഗിക്കാനും സാധിക്കും.
കർണാടകയിലേക്കും തിരിച്ച് കണ്ണൂരിലേക്കുമുള്ള ചരക്കുനീക്കവും വർധിക്കും. വിമാനത്താവളത്തിന്റെ ഉദ്ഘാടനത്തിന് മുൻപ് പാത ഏറ്റെടുക്കൽ നടപടികൾ പൂർത്തിയാകുമെന്ന പ്രതീക്ഷയിലാണ് കണ്ണൂർ ജില്ലാ പഞ്ചായത്ത്.