തൃശൂര്‍ പാണഞ്ചേരി മണികണര്‍ കോളനിയിലേക്കുള്ള പ്രധാന റോഡ് തകര്‍ന്ന് തരിപ്പണമായി. നിര്‍മിച്ച് നാലു വര്‍ഷം കഴിഞ്ഞപ്പോഴാണ് ഈ ദുര്‍ഗതി.
വഴിയില്‍ വിരിച്ച കോണ്‍ക്രീറ്റ് കട്ടകള്‍ നിരത്തെറ്റിയും ഇളകിയും താറുമാറായി.
നാലുവര്‍ഷമേ ആയിട്ടുള്ളൂ ഈ റോഡില്‍ കോണ്‍ക്രീറ്റ് കട്ടവിരിച്ചിട്ട്. പാണഞ്ചേരി പഞ്ചായത്തിലെ പ്രധാന ആദിവാസി കോളനിയിലേക്കുള്ള റോഡാണിത്.
മൂന്നു കോടി അന്‍പത്തിയെട്ടു ലക്ഷം രൂപയായിരുന്നു ചെലവ്. വനഭൂമിയായതിനാല്‍ ടാറിങ് റോഡിന് അനുമതി ലഭിച്ചിരിുന്നില്ല. അതുക്കൊണ്ടാണ് കോണ്‍ക്രീറ്റ് കട്ടകള്‍ വിരിച്ചത്. ഇരുപതുവര്‍ഷത്തേയ്ക്കു റോഡിന് ഒന്നും സംഭവിക്കില്ലെന്നായിരുന്നു വാഗ്ദാനം. എന്നാല്‍ , നാലു വര്‍ഷം ആകുമ്പോഴേക്കും
റോഡിന്റെ നിലവാരം മോശമായി. അഞ്ചര കിലോമീറ്റര്‍ നീളത്തിലായിരുന്നു റോഡ് നിര്‍മിച്ചത്. റോഡിന്റെ നിര്‍മാണത്തിലും നാട്ടുകാര്‍ക്ക് പരാതിയുണ്ടായിരുന്നു. ഇരുവശത്തും കോണ്‍ക്രീറ്റ് ചെയ്തതിലും കുഴപ്പങ്ങള്‍ നാട്ടുകാര്‍ ശ്രദ്ധയില്‍പ്പെടുത്തി. റോഡിന്റെ ശോചനീയാവസ്ഥ
അന്വേഷിക്കണമെന്ന് ആവശ്യപ്പെട്ട് വിജിലന്‍സിന് നാട്ടുകാരില്‍ ഒരാള്‍ പരാതി നല്‍കിയിട്ടുണ്ട്.
