യൂത്ത് കോണ്‍ഗ്രസ് നിയമസഭ മാര്‍ച്ചില്‍ മൂന്നാംവട്ടവും സംഘര്‍ഷം; ജലപീരങ്കിയും കണ്ണീര്‍ വാതകവും പ്രയോഗിച്ചു

സ്വർണ്ണക്കൊള്ള ഉയർത്തി യൂത്ത് കോൺഗ്രസ് നടത്തിയ  നിയമസഭാ മാർച്ചില്‍ മൂന്നാം തവണയും സംഘര്‍ഷം. പൊലീസ് ജലപീരങ്കി പ്രയോഗിച്ചു. പൊലീസിന് നേരെ കല്ലേറ് ഉണ്ടായി. ഒരാള്‍ കുഴഞ്ഞുവീണു. യൂത്ത് കോൺ​ഗ്രസ് സംസ്ഥാന പ്രസിഡന്റ് ഒ.ജെ.ജനീഷ്, അബിൻ വർക്കി എന്നിവരുടെ നേതൃത്വത്തിലാണ് മാർച്ച് നടത്തുന്നത്. 

പ്രവർത്തകർക്ക് നേരെ ഒട്ടേറെത്തവണ  പൊലീസ് ജല പീരങ്കി പ്രയോ​ഗിച്ചു. പ്രവർത്തകരോട് പിരിഞ്ഞ് പോകാൻ പൊലീസ് നിർദേശം നൽകിയിട്ടും പിന്മാറാതിരുന്നതിനാല്‍ കണ്ണീർ വാതകം പ്രയോ​ഗിച്ചു. ഇതോടെ പലർക്കും ദേഹാസ്വാസ്‌ഥ്യം ഉണ്ടായി. പരുക്കേറ്റ പ്രവർത്തകരെ ആശുപത്രിയിലേക്ക് മാറ്റി. ഇതിനിടെ രണ്ട് പ്രവർത്തകരെ പൊലീസ് അറസ്റ്റ് ചെയ്തു. യൂത്ത് കോൺഗ്രസ് പ്രവര്‍ത്തകര്‍  മുഖ്യമന്ത്രിയുടെ കോലം കത്തിച്ചു.