'പുറത്തേക്ക് വാ, നീ ജീവനോടെ പോകുമോന്ന് കാണിച്ചുതരാം'; വനിത ജഡ്​ജിയെ ഭീഷണിപ്പെടുത്തി പ്രതി

ചെക്ക് കേസില്‍ വിധി പ്രതികൂലമായതിന് പിന്നാലെ വനിത ജഡ്​ജിയെ ഭീഷണിപ്പെടുത്തി പ്രതിയും അഭിഭാഷകനും. ഏപ്രില്‍ രണ്ടിന് ഡല്‍ഹിയിലെ ദ്വാരക കോടതിയിലെ ജുഡീഷ്യല്‍ മജിസ്​ട്രേറ്റ് ശിവാംഗി മംഗ്ലയെ ആണ് അഭിഭാഷകന്‍ അതുല്‍ കുമാറും പ്രതിയും ചേര്‍ന്ന് ഭീഷണിപ്പെടുത്തിയത്. 

സിആർപിസി സെക്ഷൻ 437 എ പ്രകാരം ജാമ്യ ബോണ്ടുകൾ നൽകാൻ ജഡ്ജി പ്രതിയോട് നിർദ്ദേശിച്ചു. പിന്നാലെ ' നീ ആരാണ്? പുറത്തേക്ക് വാ, ജീവനോട് വീട്ടില്‍ പോകുമോയെന്ന് കാണാം,' എന്നാണ് റിട്ടയര്‍ ചെയ്​ത സര്‍ക്കാര്‍ അധ്യാപകന്‍ കൂടിയായ പ്രതി ജഡ്​ജിയോട് പറഞ്ഞത്. 

കയ്യില്‍ കരുതിയിരുന്ന വസ്​തു കൊണ്ട് എറിയാനും പ്രതി ശ്രമിച്ചു. 

പ്രതിയും അഭിഭാഷകനും തന്നെ മാനസികമായും ശാരീരികമായും അധിക്ഷേപിച്ചുവെന്ന് ശിവാംഗി മംഗ്ല പറഞ്ഞു. പ്രതിയെ കുറ്റവിമുക്തനാക്കാന്‍ നിര്‍ബന്ധിച്ചു. എനിക്കെതിരെ പരാതി നല്‍കുമെന്നും രാജി വപ്പിക്കുമെന്നും പറഞ്ഞു, ഉത്തരവില്‍ ജഡ്​ജി പറയുന്നു. 

പ്രതിക്കെതിരെ ജഡ്​ജി വനിത കമ്മീഷനില്‍ പരാതി നല്‍കി. കോടതിയലക്ഷ്യത്തിന് കേസെടുത്ത ജഡ്​ജി മോശം പെരുമാറ്റത്തിന് പ്രതിഭാഗം അഭിഭാഷകനായ അതുല്‍ കുമാറിന് കാരണം കാണിക്കല്‍ നോട്ടീസും നല്‍കി. ചെക് കേസില്‍ പ്രതിയെ 22 മാസത്തെ തടവിനും 6.65 ലക്ഷം പിഴയും വിധിച്ചു.