അമിത വണ്ണത്തിനെതിരെ പ്രചാരണം; മോഹൻലാലിനെ നിർദേശിച്ച് പ്രധാനമന്ത്രി

അമിത വണ്ണത്തിനെതിരായ  പ്രചാരണത്തിന് മോഹൻലാലിനെ നിർദേശിച്ച് പ്രധാനമന്ത്രി നരേന്ദ്ര മോദി. മോഹൻലാൽ, ജമ്മു കശ്മീർ മുഖ്യമന്ത്രി ഒമർ അബ്ദുള്ള, വ്യവസായി ആനന്ദ് മഹീന്ദ്ര അടക്കം  10 പേരെയാണ് നിർദേശിച്ചിട്ടുള്ളത്. ഇവർ ഇനി 10 പേരെ നിർദേശിക്കും. അത്തരത്തിൽ കൂടുതൽ പേരെ പ്രചാരണത്തിന്റെ ഭാഗമാക്കും.

ഭക്ഷ്യ എണ്ണയുടെ ഉപയോഗം കുറക്കാനും ആഹ്വാനം ചെയ്തിട്ടുണ്ട്. ഭോജ്പുരി ഗായകനും നടനുമായ നിരാഹുവ, ഷൂട്ടിംഗ് ചാമ്പ്യൻ മനു ഭാക്കർ, ഭാരോദ്വഹന താരം മീരാഭായ് ചാനു, ഇൻഫോസിസ് സഹസ്ഥാപകൻ നന്ദൻ നിലേകനി, നടൻ ആർ മാധവൻ, ഗായിക ശ്രേയ ഘോഷാൽ, സുധാ മൂർത്തി, ബിജെപി നേതാവ് ദിനേഷ് ലാൽ യാദവ് എന്നിവരാണ് പ്രധാനമന്ത്രി നിർദേശിച്ച മറ്റുള്ളവർ. 

കഴിഞ്ഞ വർഷങ്ങളിൽ അമിതവണം ഉള്ളവരുടെ എണ്ണം ഇരട്ടിയായെന്നും കുട്ടികളിൽ പോലും അമിതവണ്ണം നാല് മടങ്ങായി വർധിച്ചത് ആശങ്കാജനകമാണെന്നും നരേന്ദ്ര മോദി ഇന്നലത്തെ മൻ കി ബാത്തിൽ പറഞ്ഞിരുന്നു.