പൊതുതിരഞ്ഞെടുപ്പിലെ വോട്ടെടുപ്പ് ഒക്കെ കഴിഞ്ഞെന്നും നാട് പഴയ രീതിയിലേക്ക് മാറിയെന്നും രാവിലെ തന്നെ നാടിന്റെ മുഖ്യമന്ത്രി സഖാവ് പിണറായി വിജയന് നാട്ടുകാരോട് മാധ്യമങ്ങളെ നോക്കി വിളിച്ചുപറഞ്ഞതിനാല് തിരുവാ എതിര്വാ വീണ്ടും ആരംഭിക്കുകയാണ്. തിരഞ്ഞെടുപ്പിന് മുമ്പുള്ള കേരളത്തിലേക്ക് സുസ്വാഗതം.
രണ്ടു രണ്ടര മാസമായി ഇലക്ഷന് ചൂടിലായിരുന്നല്ലോ കേരളം. തിരഞ്ഞെടുപ്പ് ഔദ്യോഗികമായി പ്രഖ്യാപിച്ചിട്ട് ഒന്നരമാസം നമ്മള് ആ ഒരു മൂഡിലേക്ക് മാറിയിരുന്നു. കാണുന്നതും കേള്ക്കുന്നതും എന്തിന് ശ്വസിക്കുന്നതും വരെ തിരഞ്ഞെടുപ്പ് കാര്യങ്ങളായിരുന്നു. എന്നാല് അതൊക്കെ കഴിഞ്ഞെന്ന് ഇനിയെങ്കിലും നാട്ടുകാര് മനസിലാക്കണം. വോട്ടെടുപ്പ് കഴിഞ്ഞതോടെ കേരളം പഴയ കേരളമായിരിക്കുന്നു. ഇനി മലയാളികളും അങ്ങനെത്തന്നെയാവണം. അതിനുള്ള ആദ്യ അടയാളം ഇലക്ഷന്റെ പിറ്റേന്ന് തന്നെ മുഖ്യമന്ത്രി നേരിട്ടെത്തി അറിയിച്ചിട്ടുണ്ട്.
എന്താണെന്ന് വച്ചാല് മാധ്യമങ്ങളെ കണ്ടതും ചൂടായി. കടക്ക് പുറത്ത് എന്ന് പറയാന് അകത്തു കയറാത്തതുകൊണ്ട് പുറത്ത് കണ്ടവരെ വഴിമാറാനായിരുന്നു ആക്രോശം. പിണറായി വിജയന് തന്റെ സ്ഥായീ ഭാവത്തിലേക്ക് മടക്കം പോയി എന്ന് അറിഞ്ഞല്ലോ. അപ്പോ ഈ നാട്ടിലെ തിരഞ്ഞെടുപ്പ് കാലാവസ്ഥയും പിന്മാറി എന്ന് വേണം നാട്ടുകാര് അതില് നിന്നും മനസിലാക്കിയെടുക്കേണ്ടത്.
കനത്ത പോളിങ്ങാണല്ലോ കേരളത്തില് നടന്നത്. ആ ഒറ്റചോദ്യമേ മാധ്യമപ്രവര്ത്തകര് ചോദിച്ചുള്ളു. മറുപടി ഇങ്ങനെയായിപ്പോയി. അതില് നിന്ന് ഒരു കാര്യം വ്യക്തം. ഈ തിരഞ്ഞെടുപ്പ് ഇടതുമുന്നണിയെ സംബന്ധിച്ച് എന്തായിരുന്നു. തിരഞ്ഞെടുപ്പുമായി ബന്ധപ്പെട്ട് ഇനിയൊരു ചോദ്യവും ഇടതുമുന്നണിയോട് ചോദിക്കേണ്ടതില്ലെന്ന് പിണറായി തന്റെ ഒറ്റ മറുപടിയിലൂടെ പറഞ്ഞുവച്ചത് ഏതായാലും നന്നായി. മാധ്യമങ്ങള് പോയിട്ട്, സിപിഎം അണികളോ ഘടകക്ഷി നേതാക്കളോ ആരും ഇനി വലിയ ഉത്തരങ്ങളുമായി പുറത്തിറങ്ങേണ്ട കാര്യമില്ല. ഇടതുമുന്നണിക്ക് എത്ര സീറ്റ്, എത്ര ഭൂരിപക്ഷം എന്നൊക്കെ ആലോചിച്ച് തലപുണ്ണാക്കുന്നതില് നിന്ന് എല്ലാ മലയാളികളേയും രക്ഷിച്ചു എന്നുവേണം കരുതാന്.
സഖാവിന്റെ പച്ചയായ പെരുമാറ്റത്തെ നമ്മള് സഹിക്കും. കാരണം അതിലൊരു ഡിഫോള്ട്ട് സെറ്റിങ് ഉണ്ട്. എന്നാല് വേറെ ചിലര് അങ്ങനെയല്ല. വോട്ടെടുപ്പ് കഴിഞ്ഞാലും തള്ളാനുള്ള അവസരം ഒട്ടും പാഴാക്കില്ല. അല്ഫോന്സ് കണ്ണന്താനം അങ്ങനെയാണ്. മമ്മൂട്ടി നന്നായി അഭിനയിക്കുന്നതില് പണ്ടേ ഒരു കുശുമ്പ് ഉള്ളതാണ്. എറണാകുളത്തെ വോട്ടറല്ലാത്ത മോഹന്ലാലിനെ കാണാന് പോവും പക്ഷേ വോട്ടറായ മമ്മൂട്ടിയെ കാണില്ല. അങ്ങനെയൊക്കെയാണ് കക്ഷിയുടെ രീതി. ഇപ്പോ മമ്മൂട്ടി ശരിയല്ലെന്നാണ് കണ്ടെത്തല്.
ഇതിപ്പോ തല്ലുകിട്ടിയാലും അത് പറയുമ്പോള് തള്ളാന് വല്ല വകുപ്പും ഉണ്ടോന്നാണ് കണ്ണന്താനം നോക്കുന്നത്. നാട്ടുകാരിങ്ങനെ സ്ഥിരമായ ട്രോളാന് തുടങ്ങിയതുകൊണ്ട് തനിക്കെന്തു തള്ളും സാധ്യമാണെന്നൊരു വിചാരം അദ്ദേഹത്തിനുണ്ട്. എന്തും പറയാമെന്നാണ് വയ്പ്. കൂട്ടത്തില് താന് പഠിച്ചതും കിട്ടിയ ജോലിയും എല്ലാം വച്ച് തള്ളും. ഇനിയിപ്പോ ഇങ്ങനെ വിളിച്ചുപറയാന് മാത്രമായിരിക്കുമോ ഓരോരോ അവസരങ്ങളും ഉണ്ടാക്കുന്നത് എന്നാണ് സംശയം. അല്ഫോണ്സ് തള്ളന്താനം സോറി കണ്ണന്താനത്തിന്റെ തള്ളുകള്ക്ക് അതേ ഭാഷയില് പണ്ട് സിനിമയില് മമ്മൂട്ടി പറഞ്ഞ ഒരു മറുപടിയുണ്ട്.
വോട്ടെടുപ്പുകാലത്തേ വലിയ തോല്വിയായിപ്പോയവരാണ് ഇവരൊക്കെ. ഇനിയിപ്പോ ഫലം വന്ന് ജയിച്ചാലും നാട്ടുകാരെ സംബന്ധിച്ച് വലിയ തോല്വിയായിരിക്കും അത്.
കണ്ണന്താനം തള്ളലുകള്ക്ക് തല്ക്കാലം വലിയ രീതിയില് മറുപടി പറയാന് ഈ രാജ്യത്ത് ഒരാളെ നിലവിലുള്ളു. സാക്ഷാല് നരേന്ദ്ര മോദി. രണ്ടുപേരും വലിയ രീതിയില് കൊടുക്കല്വാങ്ങലുകള് നടത്തുന്ന ആളാണ്. ആകെ ഒരു വ്യത്യാസം കണ്ണന്താനം കണ്ണന്താനത്തേയും മോദിയേയും തള്ളും. മോദി പക്ഷേ മോദിയെ മാത്രമേ തള്ളാറുള്ളു. അങ്ങനെ അദ്ദേഹം ഇപ്പോള് അഞ്ചുകൊല്ലം ഭരിച്ച കാലത്തില്ലാത്ത രീതിയില് അഭിമുഖങ്ങള് കൊടുത്തുകൊണ്ടിരിക്കുകയാണ്. പ്രത്യേകം ഓര്ക്കണം, രാഷ്ട്രീയം, എതിര് ചോദ്യങ്ങള് ഇതൊന്നും പാടില്ല. അതില്ലാത്തവരിടത്ത് എന്തും സംസാരിക്കും. കൂടുതലും സ്വന്തം പ്രത്യേകതകള് പറയാനാണ് താല്പര്യം. അങ്ങനെ ബോളിവുഡ് ആക്ഷന് ഹീറോ അക്ഷയ് കുമാറുമായി അഭിമുഖം റെഡിയായി. അക്ഷയ് കുമാറാണെങ്കില് അനീതിക്കെതിരെ പ്രതികരിക്കുന്ന ആക്ഷന് റോളുകളില് നിന്ന് മാറി ഹാസ്യവേഷങ്ങള് ചെയ്യുന്നതുകൊണ്ട് അഭിമുഖം നന്നായി ആസ്വദിച്ചിട്ടുണ്ട്. നമുക്കും ആസ്വദിക്കാം.
ബാലനരേന്ദ്രന്റെ കഥകള് എഴുത്തുരൂപത്തിലും ചിത്രകഥാ രൂപത്തിലുമാണ് വന്നത്ത്. പിന്നെ ഹിമാലയ സാനുക്കളിലെ യുവാവായ നരേന്ദ്രന്റെ ജീവിതം പത്രങ്ങളില് ഖണ്ഡശ്ശയായി അച്ചടിച്ചുവരികയായിരുന്നു. അതിനുപുറമേ നേരിട്ട് പറയേണ്ട കാര്യങ്ങളാണ് ഇപ്പോ ടെലിവിഷന് വഴി അഭിമുഖങ്ങളായി എത്തുന്നത്. അക്ഷയ് കുമാറിനെ സംബന്ധിച്ച് അഭിനയം എങ്ങനെ കണ്ടുപഠിച്ച് നന്നാക്കാം എന്നൊരു വലിയ ഗുണം ഈ അഭിമുഖം വഴി ലഭിച്ചിട്ടുണ്ട്. മമത ബാനര്ജി മോദിയുടെ പിറന്നാളിന് കുര്ത്തയും മധുരവും നല്കാറുണ്ടെന്ന ഞെട്ടിക്കുന്ന വെളിപ്പടുത്തലാണ് അഭിമുഖത്തിലെ പ്രധാന ഐറ്റം.
അടുത്ത ബ്രേക്കിങ് ന്യൂസ് മോദിയുടെ ഉറക്കക്കുറവിന്റെ കാര്യത്തില് മുന് അമേരിക്കന് പ്രസിഡന്റ് ബറാക്ക് ഒബാമ പ്രകടിപ്പിച്ച ആശങ്കയാണ്. ഏതായാലും ഇന്ത്യക്കാരെ സംബന്ധിച്ച് മോദിയുടെ ഉറക്കം വലിയ പ്രശ്നം തന്നെയാണ്. നന്നായി ഉറങ്ങിയില്ലെങ്കില് വ്യക്തവും വിവേകവും പക്വതയുമുള്ള തീരുമാനം എടുക്കാന് മനുഷ്യന് കഴിയില്ലെന്നാണ് ഈ രംഗത്ത് ഗവേഷണം നടത്തുന്നവരുടെ കണ്ടെത്തല്.
വീണ്ടും കേരളത്തിലേക്കെത്തിയാല് പ്രതീക്ഷകളുടെ, സ്വപ്നങ്ങളുടെ ചാക്കും പേറി നടക്കുന്നവരാണ് ഏറിയ കൂറും. അടുത്തമാസം 23 വരെ അതുണ്ടാവും. വോട്ടുചെയ്യാന് വലിയ മനസ് കാണിച്ച മലയാളികള്ക്ക് നല്ല നമസ്കാരം പറഞ്ഞ് നിര്ത്താം.