'മോനേ ചിക്കൻ മന്തി കഴിച്ചിട്ടുണ്ടോ നീ, ഞാൻ വാങ്ങിത്തരാം, വാ'; കുഴിമന്തി ഓഫര്‍ ചെയ്ത് കുഞ്ഞിനെ പീഡിപ്പിച്ച് വയോധികന്‍

സ്കൂളിലേക്ക് പോയ ആൺ കുട്ടിയെ കുഴിമന്തി വാങ്ങിക്കൊടുക്കാമെന്ന് പറഞ്ഞ് വിളിച്ചുകൊണ്ടുപോയി ലൈംഗികമായി പീഡിപ്പിച്ച കേസിൽ 52കാരൻ പിടിയിൽ. കൊല്ലം കരുനാ​ഗപ്പള്ളിയിലാണ് സംഭവം. ആലുംകടവ് മരുസൗത്ത് കോയിത്തറ മേക്കതിൽ രാജുവി​നെയാണ് (52) കരുനാഗപ്പള്ളി പൊലീസ് പോക്സോ നിയമപ്രകാരം അറസ്റ്റ് ചെയ്തത്. 

സ്കൂളിലേക്ക് പോയ കുട്ടിയോട് കുഴിമന്തി കഴിക്കാൻ ആ​ഗ്രഹമുണ്ടോയെന്ന് രാജു ചോദിച്ചു. കുട്ടി കുഴിമന്തി കഴിക്കണം എന്ന് പറഞ്ഞതോടെ ഹോട്ടലിലേക്കെന്ന് പറഞ്ഞ് പ്രതിയുടെ വീട്ടിലേക്ക് കൊണ്ടുപോവുകയായിരുന്നു. അതിന് ശേഷമാണ് കുട്ടിയെ രാജു ലൈം​ഗികമായി ഉപയോ​ഗിച്ചത്. 

തിരികെ വീട്ടിലെത്തിയ കുഞ്ഞിന്റെ പെരുമാറ്റത്തിൽ പ്രശ്നം തോന്നിയ മാതാപിതാക്കൾ വിവരം ചോദിച്ചപ്പോഴാണ് കുട്ടി ഇക്കാര്യം തുറന്നു പറഞ്ഞത്. തുടർന്ന് കുട്ടിയുടെ മാതാപിതാക്കൾ കരുനാഗപ്പള്ളി പൊലീസ് സ്റ്റേഷനിൽ നൽകിയ പരാതിയുടെ അടിസ്ഥാനത്തിൽ കേസെടുത്ത് പ്രതിയെ പിടികൂടുകയായിരുന്നു. കരുനാഗപ്പള്ളി എസ്.എച്ച്.ഒ വി​. ബി​ജുവി​ന്റെ നേതൃത്വത്തിൽ എസ്.ഐമാരായ ഷമീർ, ആഷിഖ്, അമൽ, വേണുഗോപാൽ, എസ്.സി.പിഒ ഹാഷിം, അനിത എന്നിവർ അടങ്ങി​യ സംഘമാണ് പ്രതിയെ പിടികൂടിയത്.