കണ്ണൂരില്‍ കലോല്‍സവത്തിനിടെ നടന്ന കൊലവിളിക്ക് എന്തുണ്ട് ന്യായം? മറുപടി പറയേണ്ടത് ഭരിക്കുന്ന പാര്‍ട്ടിയാണ്. സി.പി.എമ്മും മുഖ്യമന്ത്രിയും ഈ അപമാനത്തിന്, ഈ ക്രൂരതയ്ക്ക് മറുപടി പറയണം. അപലപിക്കാനും സമാധാനം ആഹ്വാനം ചെയ്യാനും ഇനിയൊരു വട്ടം തുനിയും മുന്‍പ് ഓര്‍ക്കണം. കണ്ണൂര്‍ അടിപതറാത്ത ചെങ്കോട്ടയാണെങ്കില്‍ കലാേകരളത്തിനു മുന്നില്‍ ഈ കളങ്കം ചാര്‍ത്തിക്കൊടുത്തതും ചെങ്കൊടിയുടെ ഹുങ്ക് തന്നെയാണ്.
കണ്ണൂരിന് പല മുഖങ്ങളുണ്ട്. രാഷ്ട്രീയക്കൊലപാതകങ്ങളുടെ പേരില്‍ കണ്ണൂരിനെ ദൂരെനിന്നു വിലയിരുത്തി മുഖം തിരിക്കുന്നവര്‍ക്കറിയില്ല, കണ്ണൂരിന്റെ ഹൃദയം കരുതിവച്ചിരിക്കുന്ന സ്നേഹം. ഇത്തവണ സ്കൂള്‍ കലോല്‍സവത്തിനെത്തിയവര്‍ ആ ഊഷ്മളത അനുഭവിച്ചു മടങ്ങുമായിരുന്നു, അവര്‍ കേരളത്തോടു പറയുമായിരുന്നു, കേട്ടതൊന്നുമല്ല കണ്ണൂര്‍ എന്ന്. അത്രമേല്‍ കണ്ണൂരുകാര്‍ ഏറ്റെടുത്തിരുന്നു, ഈ കലാമേളയെ.
