ഇന്ത്യയുടെ സംഗീത ചക്രവർത്തിയാണ് എആർ റഹ്മാൻ. അദ്ദേഹത്തിന് ആദരം അർപ്പിച്ച് ദുബായിൽ ഒരു സംഗീത വിരുന്നു നടന്നു. ആ സംഗീതപരിപാടിയിലേക്ക് അപ്രതീക്ഷതിതമായി സാക്ഷാൽ എആർ റഹ്മാൻ തന്നെ എത്തിയാൽ എങ്ങനെയുണ്ടാകും.
മാസ്മരിക ഈണങ്ങളിലൂടെ സംഗീത പ്രേമികളുടെ മനസ് കീഴടക്കിയ എ.ആർ റഹ്മാന് ദുബായിലെ സ്കൂള് വിദ്യാര്ഥികളൊരുക്കിയ സ്നേഹവിരുന്നാണ് ഈ സംഗീതാര്ച്ചന. സംഗീതത്തില് കാല്നൂറ്റാണ്ടു് പിന്നിട്ട ഇന്ത്യന് സംഗീത ഇതിഹാസത്തിനുള്ള ആദരം.
മദ്രാസിൽ തുടങ്ങി ഓസ്കാര്, ഗ്രാമി അവാര്ഡുകളോളം ഉയര്ന്ന ഈ കലാകാരനെ ആദരിക്കാന് വിദ്യാര്ഥികള് തിരഞ്ഞെടുത്തതും രാജ്യസ്നേഹംനിറഞ്ഞുതുളുമ്പുന്ന വന്ദേമാതരമായിരുന്നു.ദുബായ് ഔര്ഓണ് ഇംഗ്ലീഷ് ഹൈസ്കൂളിന്റെ അമ്പതാം വാര്ഷികാഘോഷത്തോടനുബന്ധിച്ച് ബോളിവുഡ് പാര്ക്കിലെ രാജ്മഹല് തീയറ്ററിലായിരുന്നു വ്യത്യസ്തമാര്ന്ന സംഗീത പരിപാടി. അഞ്ചിനും പതിനേഴിനും ഇടയില് പ്രായമുള്ള ആയിരം വിദ്യാര്ഥികള് ദേശഭക്തിഗാനത്തില് ലയതരംഗമായി.
പാട്ടുതീർന്ന് മുഖമുയർത്തിയവർ കണ്ടത് സംഗീത മാന്ത്രികനെ. വിസ്മയമടക്കാതെ നോക്കിനിന്നവരെ നിറഞ്ഞചിരിയോടെ ചേര്ത്തുനിര്ത്തി. ഒരുനിമിഷം തരിച്ചുനിന്ന കുഞ്ഞാരാധകർ പിന്നെ ആർത്തു വിളിച്ചു.മറക്കാനാവാത്ത മനോഹര നിമിഷമാണ് സമ്മാനിച്ചതെന്ന് എ.ആര് റഹ്മാന്.ഇനിയും ഒരുപിടി നല്ല പാട്ടുകൾ മദ്രാസിൻറെ മൊസാർട്ട് സംഗീത പ്രേമികൾക്കായി കാത്തുവച്ചിട്ടുണ്ട്. കാത്തിരിക്കാം ആ പാട്ടുകൾ കേൾക്കാനായി.