ജീവിതത്തിലെ പല തരത്തിലുള്ള വൈരുദ്ധ്യങ്ങളുടെ ആകെ തുകയാകും ഒരാളുടെ വിജയം. ബില്ലി ടയ്‌ലര്‍ എന്ന യുകെ യുവാവും അതിനപവാദമല്ല. സ്‌കൂളില്‍ പഠിക്കുമ്പോള്‍ ഇംഗ്ലീഷില്‍ അമ്പേ പരാജയമായിരുന്നു കക്ഷി. ഇന്ന് ആള്‍ക്ക് അത്ര പ്രായമുണ്ടെന്നൊന്നും കരുതേണ്ട. 19 വയസ്സ് മാത്രം. ഇംഗ്ലീഷ് ഭാഷയുടെ ഭംഗി അത്ര വഴങ്ങാതിരുന്ന ബില്ലി ഇന്ന് ഇംഗ്ലീഷ് നോവലെഴുതി കാശുണ്ടാക്കുകയാണ്.
വെറുതെ കാശുണ്ടാക്കുകയല്ല, യുഎസിലെ കഴിഞ്ഞ വര്‍ഷത്തെ 10 ബെസ്റ്റ് സെല്ലര്‍ പുസ്തകങ്ങളുടെ പട്ടികയില്‍ ഇടം നേടിയിരിക്കുകയാണ് ബില്ലിയുടെ ജസ്റ്റ് ഫ്രണ്ട്‌സ് എന്ന നോവല്‍.
സ്‌കൂളില്‍ ഇംഗ്ലീഷിന് സ്വകാര്യ ട്യൂഷന്‍ മാസ്റ്ററെ വെക്കേണ്ട അവസ്ഥയായിരുന്നു അവനുണ്ടായിരുന്നത്. അത്രയ്ക്ക് കേമമായിരുന്നു പഠിപ്പ്. എന്നാല്‍ കഴിഞ്ഞ വര്‍ഷം അവന്‍ ഒരു നോവലങ്ങ് എഴുതി. പബ്ലിഷ് ചെയ്യാന്‍ പ്രസാധകരെ കിട്ടിയില്ല. അതുകൊണ്ട് സെല്‍ഫ് പബ്ലിഷ് ചെയ്തു പുസ്തകം. സ്വപ്‌നത്തില്‍ കണ്ട ഒരു ലവ് സ്റ്റോറി ആയിരുന്നു ബില്ലി നോവലായി എഴുതിയത്. 17ാം വയസ്സിലായിരുന്നു പുസ്തകം എഴുതിയതെന്ന് ബില്ലി പറയുന്നു.
