ഭർത്താവിന്റെ രഹസ്യ ബന്ധം കണ്ടുപിടിച്ചാൽ ഏത് ഭാര്യയും രോഷാകുലയാകും. എന്നാൽ, അത് വിമാനത്തിൽ വച്ചാണെങ്കിലോ? സംഗതി ഗുലുമാലാകും. ക്ലൈമാക്സിൽ വിമാനത്തിന് എമർജൻസി ലാൻഡിങ് വേണ്ടി വന്നു എന്നുപറഞ്ഞാൽ മതിയല്ലോ? ദോഹ–ബാലി വിമാനത്തിലെ വനിതാ യാത്രക്കാരിയാണ് പ്രശ്നം സൃഷ്ടിച്ചത്. ഭർത്താവിന്റെ ഫോൺ അൺലോക്ക് ചെയ്തതാണ് പ്രശ്നത്തിന്റെ തുടക്കം. ഫിംഗർ പ്രിന്റ് ഉപയോഗിച്ച് മാത്രം തുറക്കാൻ സാധിക്കുന്ന ഫോൺ ഉറങ്ങുകയായിരുന്ന ഭർത്താവിന്റെ വിരൽ ഉപയോഗിച്ച് തുറക്കുകയായിരുന്നു.
ഇതോടെ ഭർത്താവിന്റെ രഹസ്യ ബന്ധം പുറത്തായി. സംഭവം അറിഞ്ഞതോടെ അവർ രോഷാകുലയായി. ഭർത്താവുമായി വഴക്കായി. ശബ്ദം ഉയർന്നതോടെ, സംഭവം കയ്യാങ്കളിയാകുകയും ചെയ്തു, മറ്റുള്ള യാത്രക്കാർക്കും ഇത് പ്രശ്നം സൃഷ്ടിച്ചു. ശാന്തരാകാൻ കാബിൻ ക്രൂ ആവശ്യപ്പെട്ടെങ്കിലും അവർ വളരെ മോശമായി പ്രതികരിക്കുകയായിരുന്നു. സ്ത്രീ മദ്യലഹരിയിലായിരുന്നുവെന്നും പറയുന്നുണ്ട്.
തുടർന്ന്, ക്യാപ്റ്റൻ വിമാനം ചെന്നൈ വിമാനത്താവളത്തിലേക്ക് തിരിച്ചുവിടുകയും ഇറാൻ സ്വദേശികളായ ദമ്പതികളെയും കുട്ടിയെയും അവിടെ ഇറക്കുകയുമായിരുന്നു. പിന്നീട് വിമാനം ബാലിയിലേക്ക് യാത്ര തുടരുകയും ചെയ്തു.
