പണ്ട് കാലത്ത് നാവികര് കടല്യാത്രകളില് ദിശയറിയാന് സൂര്യനേയും നക്ഷത്രങ്ങളേയുമാണ് കൂട്ടുപിടിച്ചത്. എന്നാല് സൂര്യനെയും നക്ഷത്രങ്ങളെയും കാണാനാവാത്തവിധം നിബിഡമായ മഞ്ഞിലകപ്പെട്ടാലോ. അതായിരുന്നു വൈക്കിങ്ങുകള് നേരിട്ട പ്രതിസന്ധി. ഈ പ്രതിസന്ധി അവര് മറികടന്നത് സൂര്യകാന്തക്കല്ല് ഉപയോഗിച്ചായിരുന്നു. പൊട്ട് വെളിച്ചത്തെ പോലും ചിതറി തെറിപ്പിക്കാന് ശേഷിയുളള കല്ലിന്റെ സഹായത്തോടെ അവര് കടല്യാത്രകള് നടത്തി.
എട്ടാം നൂറ്റാണ്ടിന്റെ അവസാന കാലം മുതല് പതിനൊന്നാം നൂറ്റാണ്ടിന്റെ ആദ്യ കാലഘട്ടം വരെ യൂറോപ്പിലെ പലഭാഗങ്ങളിലും പോരാളികളായും പര്യവേഷകരായും വ്യാപാരികളായും കടല്ക്കൊള്ളക്കാരായും ജീവിച്ചവരാണ് വൈക്കിങ്ങുകള്. നോര്സ് (സ്കാന്ഡിനേവിയന്) ജനതയിലെ ഒരു വിഭാഗമാണിവര്. ഇവര് അതിസാഹസികമായി കടല്യാത്രകള് നടത്തിയിരുന്നു. എന്നാല് നിബിഡമായ മഞ്ഞിനിടയിലൂടെയുളള യാത്രകളില് ദിശയറിയാന് എന്താണ് ഉപയോഗിച്ചിരുന്നത് എന്നുളളത് അജ്ഞാതമായിരുന്നു. അതാണ് ഇപ്പോള് കണ്ടെത്തിയിരിക്കുന്നത്.