കോഴിക്കോട് കക്കോടി എന്ന സ്ഥലത്ത് അഞ്ചു സെന്റ് പ്ലോട്ടിൽ 1490 ചതുരശ്രയടിയിലാണ് ഈ വീട് സ്ഥിതി ചെയ്യുന്നത്. ചെറിയ ബജറ്റിൽ അത്യാവശ്യ സൗകര്യങ്ങൾ എല്ലാമുള്ള ഇരുനില വീട് വേണം, കാറ്റും വെളിച്ചവും നിറയുന്ന അകത്തളങ്ങൾ ആയിരിക്കണം എന്നിവയായിരുന്നു ഉടമസ്ഥന്റെ ഡിമാൻഡ്.
സമകാലിക ശൈലിയിൽ വൈറ്റ് തീമിലാണ് വീടിന്റെ എലിവേഷൻ. പല തലങ്ങളിലായി പരന്നുകിടക്കുന്നതുകൊണ്ട് വീടിനു കൂടുതൽ വിശാലത തോന്നിക്കുന്നു. കാറ്റിനെയും വെളിച്ചത്തെയും അകത്തേക്ക് ക്ഷണിക്കുന്ന കോർണർ വിൻഡോകളാണ് എലിവേഷനിലെ ഹൈലൈറ്റ്. മുകളിൽ പലയിടത്തും ഗ്രേ ക്ലാഡിങ് ടൈലുകൾ വിരിച്ച് ഭംഗിയാക്കി. എലിവേഷനിൽ ഹൈലൈറ്റർ എൽഇഡി ലൈറ്റുകളും നൽകിയിട്ടുണ്ട്.
പോർച്ചിനു വശത്തായി സിറ്റ്ഔട്ട്. ഇവിടെ പ്ലാന്റർ ബോക്സ് നൽകിയിട്ടുണ്ട്. അനാവശ്യഭിത്തികൾ ഒഴിവാക്കിയത് അകത്തളങ്ങൾക്ക് വിശാലത നൽകുന്നു. പ്രധാന ഭിത്തികളിൽ ഹൈലൈറ്റർ നിറങ്ങൾ നൽകിയത് ശ്രദ്ധേയമാണ്. വിട്രിഫൈഡ് ടൈലുകളാണ് ഫ്ലോറിങ്ങിനു നൽകിയത്. ബ്ലാക് ലെതർ കുഷൻ ഫാബ്രിക്കിലുള്ള ഫർണിച്ചറുകൾ പുറത്തുനിന്നും വാങ്ങി. ലിവിങ്ങിലെ ഭിത്തിയിൽ ഗ്രേ ടെക്സ്ചർ പെയിന്റ് നൽകി ടിവി യൂണിറ്റ് ക്രമീകരിച്ചു.
എട്ടുപേർക്കിരിക്കാവുന്ന ചെറിയ ഊണുമേശ. തടിയിൽ ഗ്ലാസ് ടോപ് നൽകി. ഊണുമുറിയിൽ വാഷ് ഏരിയയുടെ ഭിത്തിയിൽ മഞ്ഞ ഹൈലൈറ്റർ നിറങ്ങൾ നൽകിയത് ശ്രദ്ധേയമാണ്. ഇവിടെ ഹാങ്ങിങ് ലൈറ്റുകളും നൽകിയിട്ടുണ്ട്.