കൃഷി നശിച്ച് പട്ടിണിയിലായ കർഷകനെ ഭാഗ്യം തേടിയെത്തിയത് കോഹിനൂർ രത്നത്തിന്റെ രൂപത്തിൽ. മധ്യപ്രദേശിലെ ബുണ്ടേൽഖണ്ഢിലുള്ള സുരേഷ് യാദവ് എന്ന 40കാരനാണ് ആ ഭാഗ്യശാലി. കൃഷിയിടത്തിലെ വിളകളെല്ലാം നശിച്ച് വിഷമിച്ചപ്പോഴും ഈ കർഷകന് തന്നെ മണ്ണു ചതിക്കില്ലെന്ന വിശ്വാസമുണ്ടായിരുന്നു.സർക്കാരിന്റെ പാട്ടഭൂമിയിൽ നടത്തിയ ഭാഗ്യപരീക്ഷണമാണ് കർഷകനെ ലക്ഷപ്രഭുവാക്കിയത്.
പന്നാ ജില്ലയിലെ പാടി കൃഷൻ കല്യാൺപുരയിലാണ് സർക്കാരിന്റെ ഖനി വകുപ്പിന്റെ ഉടമസ്ഥതയിലുള്ള ഈ ഭൂമി. ഇത് സുരേഷ് യാദവ് പാട്ടത്തിനെടുത്തതാണ്. എല്ലാ വർഷവും കനത്ത മഴയിലും വെള്ളപ്പൊക്കത്തിൽ സ്വന്തം കൃഷിഭൂമിയിലെ വിളകൾ നശിച്ചു പോവുകയാണ് പതിവ്. ആ സമയങ്ങളിൽ ഭാഗ്യം പരീക്ഷിക്കാനാണ് വൻ തോതിൽ വജ്ര നിക്ഷേപമുണ്ടെന്നു കരുതപ്പെടുന്ന ഈ ഭൂമി പാട്ടത്തിനെടുത്തത്. മഴക്കാലത്ത് കുഴിയെടുക്കാൻ എളുപ്പമായിരുന്നു. ഏകദേശം 15 അടിയോളം കുഴിയെടുത്തപ്പോഴാണ് വജ്രത്തിളക്കം സുരേഷിന്റെ കണ്ണിൽ പെട്ടത്.
