വെസ്റ്റ് ഇന്ഡീസിനെതിരായ നാലാം ഏകദിനത്തിലെ തോല്വിക്കു ശേഷം നിരാശനായിരിക്കുന്ന മഹേന്ദ്രസിങ് ധോണിയുടെ ദൃശ്യം സമൂഹമാധ്യമങ്ങളില് വൈറലാണ്. 114 പന്ത് നേരിട്ട് അര്ധസെഞ്ചുറി നേടിയിട്ടും, ടീം പരാജയപ്പെട്ടതാണ് മുന്പെങ്ങും കണ്ടിട്ടില്ലാത്തവിധം ധോണിയെ നിരാശനാക്കിയത്.
ക്രിക്കറ്റ് ആരാധകരുടെ മനസ്സില് നിന്നും മായുന്നില്ല ധോണിയുടെ ഈ ഇരിപ്പ്. ക്രിക്കറ്റ് മൈതാനത്ത് അത് ലോകകപ്പ് മല്സരത്തിലാണെങ്കില് പോലും വികാരപ്രകടനം നടത്താത്ത ധോണിയുടെ ഒരു വ്യത്യസ്ത ഭാവം.
കടുത്ത ധോണി വിരുദ്ധര് പോലും ആ നിസഹായതയില് മുന് ക്യാപ്റ്റനൊപ്പം പങ്കുചേരുന്നു. ഒരു തോല്വിയില് പഴിപറയാന് വെമ്പല് കൊള്ളുന്ന സാമൂഹ്യമാധ്യമങ്ങള് ഇക്കുറി ധോണിക്ക് പിന്തുണയുമായാണ് എത്തിയിരിക്കുന്നത്. 114 പന്തില് 54 റണ്സായിരുന്നു മുന് ക്യാപ്റ്റന്റെ സമ്പാദ്യം. അര്ധസെഞ്ചുറിയിലേക്കെത്തിയത് 108 പന്തില്- ഒരിന്ത്യന് താരം ഏകദിനത്തില് നേടിയ ഏറ്റവും സാവധാനത്തിലുള്ള അര്ധസെഞ്ചുറി. നാണക്കേടിന്റെ റെക്കോര്ഡ് 104 പന്തില് 50 എടുത്ത ഗാംഗുലിയില് നിന്ന് ധോണിയുടെ പേരിലേക്ക് മാറി. അപ്പോഴും ക്രിക്കറ്റ് ആരാധകര് ആശ്വസിപ്പിക്കുകയാണ് ധോണിയെ. താങ്കള് ഇല്ലായിരുന്നുവെങ്കില് ഇതിലും മോശമാകുമായിരുന്നു മല്സരത്തിലെ ഇന്ത്യയുടെ സ്ഥിതി.