കൊച്ചിയില് ഓണ്ലൈന് ടാക്സ് ഡ്രൈവര്ക്ക് മര്ദ്ദനമേറ്റ സംഭവത്തില് തെറ്റ് പൂര്ണമായും യുവതികളുടെ ഭാഗത്തെന്ന് ദൃക്സാക്ഷിയുടെ വെളിപ്പെടുത്തല്. യുവതികള് സംഘം ചേര്ന്ന് ഏകപക്ഷീയമായി ഡ്രൈവറെ ആക്രമിക്കുകയായിരുന്നെന്ന് സംഭവം നടന്ന സമയത്ത് വാഹനത്തിലുണ്ടായിരുന്ന യാത്രക്കാരന് ഷിനോജ് മനോരമ ന്യൂസിനോട് പറഞ്ഞു. ഡ്രൈവര് മോശമായി പെരുമാറിയെന്ന യുവതികളുടെ ആരോപണം കളവാണെന്നും ഷിനോജ് പറയുന്നു.
ഓണ്ലൈന് ടാക്സി ഡ്രൈവറായ ഷഫീക്കിനെ വൈറ്റിലയ്ക്കു സമീപം മൂന്നു യുവതികള് ചേര്ന്ന് മര്ദ്ദിച്ച സംഭവത്തിന്റെ തുടക്കം മുതല് കണ്ട ഏകസാക്ഷിയാണ് തൃപ്പൂണിത്തുറയിലെ സ്വകാര്യ സ്ഥാപനത്തില് ജീവനക്കാരനായ ഷിനോജ്. പൂള് ടാക്്സി പ്രകാരം വിളിച്ച വാഹനത്തില് നിന്ന് ഷിനോജിനെ ഇറക്കിവിടണമെന്നാവശ്യപ്പെട്ട് യുവതികള് ഡ്രൈവറായ ഷഫീക്കിനോട് കയര്ത്തു. എന്നാല് ഇതിന് ഷഫീക്ക് തയാറാകാത്തതിനെ യുവതികള് അക്രമാസക്തരാകുകയായിരുന്നെന്ന് ഷിനോജ് വെളിപ്പെടുത്തുന്നു.
കരിങ്കല്ലു കൊണ്ട് തലയ്ക്കടിച്ചെന്നും നിലത്തിട്ട് ചവിട്ടിയെന്നുമുളള ഷഫീക്കിന്റെ പരാതി പൂര്ണമായും സത്യമെന്നും ഷിനോജ് പറഞ്ഞു. ഇതിനു പുറമേ നടുറോഡില് ഷഫീക്കിന്റെ മുണ്ടഴിച്ച് അടിവസ്ത്രം വരെ യുവതികള് വലിച്ചു കീറിയെന്നും ഷിനോജ് സാക്ഷ്യം പറയുന്നു. ഷഫീക്ക് മോശമായി പെരുമാറിയെന്ന യുവതികളുടെ വാദവും ഷിനോജ് തളളിക്കളഞ്ഞു. അക്രമത്തിന്റെ തീവ്രതയനുസരിച്ച് ജാമ്യമില്ലാത്ത വകുപ്പുപ്രകാരം യുവതികള്ക്കെതിരെ കേസെടുക്കുമെന്ന് തന്റെ മൊഴിയെടുത്ത പൊലീസ് ഉദ്യോഗസ്ഥര് തന്നോട് ആദ്യം പറഞ്ഞിരുന്നെങ്കിലും പിന്നീട് സ്റ്റേഷന് ജാമ്യത്തില് വിട്ടതെന്തു കൊണ്ടാണെന്ന് അറിയില്ലെന്നും ഷിനോജ് പറഞ്ഞു.