തമിഴ്നാട്ടില് പുതിയ സര്ക്കാര് രൂപീകരിക്കാന് ഗവര്ണര് സി. വിദ്യാസാഗര് റാവുവിന് മേല് സമ്മര്ദമേറി. എടപ്പാടി പളനിസാമിയും ഒ. പനീര്സെല്വവും വീണ്ടും രാജ്ഭവനിലെത്തി അവകാശവാദം ഉന്നയിച്ചു. മുഖ്യമന്ത്രി ആരെന്ന് തീരുമാനിക്കാന് നിയമസഭാതലത്തില് കോംപോസിറ്റ് വോട്ടിങ് അഥവാ സമഗ്ര വോട്ടിങ്ങിനുള്ള സാധ്യതയാണ് കൂടുതല്.
ദിവസങ്ങളായി തുടരുന്ന രാഷ്ട്രീയ അനിശ്ചിതത്വവും ഭരണസ്തംഭനവും പുതിയ തലത്തിലേക്ക് നീങ്ങുന്നതിനിടെ എടപ്പാടി പളനിസാമിയും ഒ. പനീര്സെല്വവും വീണ്ടും രാജ്ഭവനിലെത്തി സത്യപ്രതിജ്ഞക്കായി അവകാശവാദമുന്നയിച്ചു.
എംഎല്മാരുടെ എണ്ണത്തിലെ നിജസ്ഥിതി ഗവര്ണറെ ബോധ്യപ്പെടുത്താന് ഇരുപക്ഷത്തിനും കഴിഞ്ഞിട്ടില്ല. തീരുമാനം വൈകുന്നതിന് കാരണവും മറ്റൊന്നല്ല. ആരെ ആദ്യം വിശ്വാവോട്ട് തേടാന് സഭയിലേക്ക് അയയ്ക്കും എന്നതാണ് ചോദ്യം. സര്ക്കാരിന്റെ ഭൂരിപക്ഷം തെളിയിക്കേണ്ടത് സഭാതലത്തില് തന്നെവേണമെന്നാണ് ഗവര്ണര്ക്ക് കിട്ടിയ നിയമോപദേശങ്ങളെല്ലാം. മുഖ്യമന്ത്രി നിയമനത്തിന് അവകാശ വാദമുന്നയിച്ച പനീര്സെല്വത്തെയും പളനിസാമിയെയും നിയമസഭയില് വിശ്വാസ വോട്ട് തേടാന് ഗവര്ണര് ആവശ്യപ്പെടുമെന്നാണ് പൊതുവിലയിരുത്തല്. അങ്ങനെയെങ്കില് ഇപ്പോള് സഭയിലുള്ള 233 അംഗങ്ങള് വോട്ടിലൂടെ മുഖ്യമന്ത്രിയെ തീരുമാനിയ്ക്കും.