മുംബൈയിൽനിന്ന് ചണ്ഡിഗഢിലേക്കുള്ള ഇൻഡിഗോ വിമാനത്തിൽ വൻ സുരക്ഷാ വീഴ്ച. മുംബൈ വിമാനത്താവളത്തിൽനിന്ന് വിമാനം പറന്നുയരുന്നതിനു തൊട്ടുമുൻപ് യാത്രക്കാരൻ എമർജൻസി വാതിൽ തുറന്നു. രാവിലെ പതിനൊന്നോടെയായിരുന്നു സംഭവം. ഇതേത്തുടർന്നു വിമാനം യാത്ര തുടങ്ങാൻ രണ്ടു മണിക്കൂറോളം വൈകി. ഇൻഡിഗോയുടെ 6ഇ 4134 നമ്പറിലുള്ള വിമാനത്തിലാണു സംഭവം. യാത്രക്കാരനെ സുരക്ഷാസേനയ്ക്കു കൈമാറി. സംഭവത്തിൽ പൊലീസ് എഫ്ഐആർ റജിസ്റ്റർ ചെയ്തിട്ടുണ്ട്.
സംഭവം സ്ഥിരീകരിച്ച് എയർലൈൻ അധികൃതർ വാർത്താക്കുറിപ്പ് ഇറക്കി. 12സി സീറ്റിലിരുന്ന യാത്രക്കാരനാണ് എമർജൻസി വാതിൽ തുറന്നത്. ഉടൻതന്നെ ഇൻഡിഗോ ജീവനക്കാർ ക്യാപ്റ്റനെ വിവരം അറിയിക്കുകയായിരുന്നു. സമീപമിരുന്ന യാത്രക്കാരനു പരുക്കേറ്റിട്ടുണ്ട്. ഇയാള്‍ക്ക് ആവശ്യമായ മെഡിക്കൽ സഹായം നൽകിയിട്ടുണ്ടെന്നും വാർത്താക്കുറിപ്പിൽ അറിയിച്ചു.
×