ദുബായ്: ഐ ബി എം സി ഫിനാൻഷ്യൽ പ്രഫഷനൽ ഗ്രൂപ്പിൻ്റെ യു എ ഇ - ഇന്ത്യ ബിടുബി സെൻ്റർ സേവനങ്ങൾക്ക് യു എ ഇ യിലും ഇന്ത്യയിലും തുടക്കം കുറിച്ചു. ഇരു രാജ്യങ്ങൾക്കും ഇടയിലെ നിക്ഷേപ, വ്യവസായ സാഹചര്യങ്ങൾ പ്രയോജനപ്പെടുത്താൻ ആഗ്രഹിക്കുന്ന പ്രവാസി ഇന്ത്യക്കാർക്കും വിദേശ നിക്ഷേപകർക്കും രാജ്യാന്തര വ്യാപാര സമൂഹത്തിനും ഒരു പോലെ ഗുണകരമാകുന്ന സംരംഭമാണ് ഇതെന്ന് അധികൃതർ പറഞ്ഞു.
ലോകത്തെ അതിവേഗം വളരുന്ന സമ്പദ് വ്യവസ്ഥകളായ യു എ ഇ യും ഇന്ത്യയും തമ്മിലുള്ള വമ്പിച്ച നിക്ഷേപ, വാണിജ്യ, വ്യവസായ അവസരങ്ങൾ മനസിലാക്കാനും വിശകലനം ചെയ്യാനും പ്രായോഗിക തലത്തിൽ എത്തിക്കുവാനും സഹായകമാകുന്ന വിധത്തിലുള്ള സേവനങ്ങൾ ഏക ജാലകത്തിലൂടെ നൽകുവാനാണ് യു എ ഇ - ഇന്ത്യ ബിടുബി സെൻ്ററിലൂടെ ലക്ഷ്യമിടുന്നത്. ദുബായ് അൽ മനാര ഓഫീസിൽ നടന്ന പ്രത്യേക ചടങ്ങിൽ ഐ ബി എം സി- യു എ ഇ ഗ്രൂപ് ചെയർമാനായഷെയ്ഖ് ഖാലിദ്‌ ബിൻ അഹമദ് അൽ ഹാമദും ഐ ബി എം സി ഗ്രൂപ്പ് മാനേജിങ് ഡയറക്ടറും സി ഇ ഓ യുമായ പി.കെ. സജിത്കുമാറും സംയുക്തമായി ആദ്യ യു എ ഇ – ഇന്ത്യ ബിടുബി സെന്റർ ഉദ്ഘാടനം ചെയ്തു. ഐ ബി എം സി ഫിനാൻഷ്യൽ പ്രഫഷനൽ ഗ്രൂപ്പ് സി ബി ഒ & എക്സിക്യുട്ടിവ് ഡയറക്ടർ പി.എസ്. അനൂപ്‌ റാഷിദ് അൽ നൂരി, സിഇഒ ക്ലബ്സ് സിഇഒ ഡോ. താരിഖ് നിസാമി, അഡ്വ. ബിനോയ്‌ ശശി തുടങ്ങിയവർ സംബന്ധിച്ചു.
യുഎഇയിലും ഇന്ത്യയിലും നിലവിലുള്ള ബിസിനസ് അവസരങ്ങൾ അറിയുവാനും അപഗ്രഥിക്കുവാനും നിക്ഷേപ തലത്തിൽ എത്തിക്കുവാനും ഉതകും വിധമുള്ള ഏക ജാലക സംവിധാനത്തിന്റെ അഭാവമാണ് ബിടുബി സെൻ്റർ നിലവിൽ വരുന്നതോടെ പരിഹരിക്കപ്പെടുന്നതെന്നും ഇരു രാജ്യങ്ങളും ഒരുക്കുന്ന വൻ നിക്ഷേപ സാദ്ധ്യതകൾ പ്രയോജനപ്പെടുത്താൻ ആഗ്രഹിക്കുന്ന ഏതൊരു നിക്ഷേപകനും സെന്ററിൻ്റെ സേവനങ്ങൾ ഉപകാരപ്പെടുമെന്നും ഷെയ്ഖ് ഖാലിദ്‌ ബിൻ അഹമദ് അൽ ഹാമദ് പറഞ്ഞു.
യു എ ഇ – ഇന്ത്യ ബിടുബി സെന്ററിലൂടെ ഇരു രാജ്യങ്ങളിലുമുള്ള വിവിധ നിക്ഷേപ അവസരങ്ങൾ അനുയോജ്യരായ നിക്ഷേപകർക്ക് മുന്നിൽ എത്തിക്കുവാനുള്ള സംവിധാനമാണ് നിലവിൽ വരുന്നത്. ബിസിനസ് തുടങ്ങാനുള്ള നടപടിക്രമങ്ങളെക്കുറിച്ചും സർക്കാർ സ്വകാര്യ സംരംഭങ്ങളെക്കുറിച്ചുള്ള വിവരങ്ങളും ഇതിലൂടെ ലഭ്യമാക്കും. റജിസ്റ്റർ ചെയ്ത സ്ഥാപനങ്ങൾക്ക് നിലവിലുള്ളതും വരാനിരിക്കുന്നതുമായ പൊതു–സ്വകാര്യ പാർട്ണർഷിപ്പ് പദ്ധതികള്‍, എഫ് ഡിഎെ, എഫ് പിഎെ തുടങ്ങി ബിസിനസ് അവസരങ്ങളെപ്പറ്റി വിവരങ്ങൾ ലഭ്യമാക്കുന്നതോടൊപ്പം റജിസ്റ്റർ ചെയ്ത പദ്ധതികളെക്കുറിച്ചും കമ്പനികളെക്കുറിച്ചുമുള്ള വിശദ വിവരങ്ങളും ലഭ്യമാക്കും .
ഇന്ത്യയിലെയും യു എ ഇ യിലെയും വ്യാവസായിക രംഗത്തെ വിദഗ്ധരടങ്ങുന്ന സംഘമാണ് സേവനങ്ങൾ ഒരുക്കുന്നത് എന്നത് കൊണ്ട് നിക്ഷേപ സാധ്യതകളെ പ്രായോഗിക തലത്തിൽ കൊണ്ടുവരുവാനുള്ള മാർഗനിർദേശങ്ങളും ഇതിലൂടെ നൽകുവാനാകുമെന്നും ഐ ബി എം സി ഗ്രൂപ്പിന്റെമാനേജിങ് ഡയറക്ടറും സി ഇ ഒയുമായ പി.കെ. സജിത്കുമാർ പറഞ്ഞു. ഇരു രാജ്യങ്ങൾക്കുമിടയിലുള്ള അവസരങ്ങൾ പ്രയോജനപ്പെടുത്താൻ ആഗ്രഹിക്കുന്ന സ്ഥാപനങ്ങൾക്കും വ്യക്തികൾക്കും ബിടുബി പോർട്ടലിൻറെ അംഗത്വം ലഭ്യമാകും. സെമിനാറുകൾ, ശില്പശാലകൾ എന്നിവയും പ്രദർശനങ്ങളും സംഘടിപ്പിക്കും .ഐ ബി എം സി - യു എ ഇ ഗ്രൂപ് പാർട്ണർ മാരായ മോണിക്ക അഗർവാൾ , ശശികുമാർ, അനസൂയ, ജിത തുടങ്ങിയവരും ഖാലിദ്‌ അൽ ഹാമദ് ഗ്രൂപ് ഉന്നത ഉദ്യോഗസ്ഥരും ചടങ്ങിൽ പങ്കെടുത്തു
