ദുബായ് : പ്രമേഹ ബോധവൽക്കരണം ലക്ഷ്യമിട്ട് " ലുലു വാക്ക് ഫോർ വെൽനെസ്സ് എന്ന പേരിൽ " ലുലു ഗ്രൂപ്പ് സംഘടിപ്പിച്ച കൂട്ട നടത്തം ജന പങ്കാളിത്തം കൊണ്ട് ശ്രദ്ധേയമായി. ലുലുവിന്റെ സന്നദ്ധ സേവനങ്ങളുടെ ഭാഗമായിവെള്ളിയാഴ്ച്ച ദുബായിലെ സബീൽ പാർക്കിലും അൽ ഐൻ അൽ ജാഹിലി പാർക്കിലുമാണ് കൂട്ടനടത്തം സംഘടിപ്പിച്ചത്.
ദുബായ് സബീൽ പാർക്കിൽ ദുബായ് സെൻട്രൽ ലാബോറട്ടറി മേധാവി അബ്ദുൾ റഹ്മാൻ അൽ അലി , ലുലു ഗ്രൂപ്പ് റീജിയണൽ ഡയറക്ടർ ജെയിംസ് കെ. വർഗീസ്, ദുബായ് സ്പോർട്സ് കൌൺസിൽ പ്രതിനിധി മൂത്താസ് അൽ ശഷരീഫ് എന്നിവർ ചേർന്നു ഫ്ലാഗ് ഓഫ് ചെയ്തു.
അൽ ഐൻ മാനവിക വിഭവ മന്ത്രാലയം ഡെപ്യൂട്ടി മാനേജർ മുഹമ്മദ് നയെ സയിദ് അൽന്യാദിയും ലുലു ഗ്രൂപ്പ് റീജിയണൽ ഡയറക്ടർ ഷാജി ജമാലുദ്ദീനും ചേർന്നാണ് അൽ ഐനിൽ ഫ്ലാഗ് ഓഫ് ചെയ്തതത് .
ഇതു തുടർച്ചയായ അഞ്ചാം വർഷമാണ് ലുലു ഗ്രൂപ്പ് കൂട്ട നടത്തം സംഘടിപ്പിക്കുന്നത്. ദുബായ് സ്പോർട്സ് കൗൺസിലിന്റേയും അൽ ഐൻ മുനിസിപ്പാലിറ്റിയുടേയും സഹകരണത്തോടെയായിരുന്നു ഈ വർഷം വെൽനെസ്സ് വാക്ക് സംഘടിപ്പിച്ചത്. പങ്കെടുക്കുവാനുള്ള റജിസ്ട്രേഷൻ തികച്ചും സൗജന്യമായിരുന്നു. വിവിധ എമിറേറ്റുകളിൽനിന്നുമായി സ്ത്രീകളും കുട്ടികളുമുൾപ്പെടെ നൂറുകണക്കിനാളുകൾ പങ്കെടുത്ത വെൽനെസ്സ് വാക്ക് വൻ വിജയമായിരുന്നെന്ന് സംഘാടകർ പറഞ്ഞു.
പ്രവാസികളുടെ ദൈനംദിന ജീവിതത്തിൽ വ്യായാമത്തിനുള്ള പ്രാധാന്യം അറിയിക്കുന്നതോടൊപ്പം കുടുംബസമേതം പങ്കെടുക്കാവുന്ന ഒരു പരിപാടി എന്ന നിലയിലായിരുന്നു ഈ വർഷവും വെൽനെസ്സ് വാക്ക് സംഘടിപ്പിച്ചത്. കൂടാതെ കുട്ടികൾക്കും മുതിർന്നവർക്കും ആസ്വദിക്കാവുന്ന വിവിധതരം വിനോദ പരിപാടികളും പ്രമേഹ രോഗ നിർണയ ക്യാംപും വെൽനെസ്സ് വാക്കിന്റെ ഭാഗമായി പാർക്കുകളിൽ ഒരുക്കിയിട്ടുണ്ടായിരുന്നു .