അബുദാബി : ദശകങ്ങളായി ഇന്ത്യൻ രാഷ്ട്രീയരംഗത്ത് മികവുറ്റ പ്രവർത്തനങ്ങൾ കൊണ്ട് ഏറെ ശ്രദ്ധയും ജനാംഗീകാരവും നേടിയ നേതാവാണ് ഇ. അഹമ്മദ് എംപിയെന്ന് എൻഎംസി സ്ഥാപകനും സിഇഒയും യുഎഇ എക്സ്ചേഞ്ച് ചെയർമാനുമായ ഡോ.ബി.ആർ.ഷെട്ടി പറഞ്ഞു.
ഐക്യരാഷ്ട്ര സഭയുടെ വേദികളിലെ ഇന്ത്യൻ പ്രതിനിധിയെന്ന നിലയിൽ വരെ അദ്ദേഹം നമ്മുടെ നാടിന്റെ സത്കീർത്തി ഉയർത്തിപ്പിടിച്ചു. മതവിശ്വാസിയായിരിക്കെത്തന്നെ ഏറ്റവും ഉന്നതമായ മതേതര ബോധത്തോടെ ജനങ്ങൾക്കിടയിൽ ജീവിച്ച അദ്ദേഹം, സഭകളിൽ വിഷയങ്ങൾ സവിസ്തരം പഠിച്ച് അവതരിപ്പിക്കുന്നതിൽ മിടുക്കനായിരുന്നു. കക്ഷിഭേദമന്യേ എല്ലാവർക്കും ആശ്രയിക്കാവുന്ന, സംശയനിവാരണം നടത്താവുന്ന പാർലമെന്റേറിയനായിരുന്നു അഹമ്മദ് എന്ന് പല സുഹൃത്തുക്കളും പറഞ്ഞുകേട്ടിട്ടുണ്ട്.
ഞങ്ങൾ വേദികൾ പങ്കിട്ടപ്പോഴും സാമൂഹിക മാധ്യമങ്ങളിൽ അദ്ദേഹത്തിന്റെ ചില പ്രസംഗശകലങ്ങൾ കേട്ടപ്പോഴും അവ എന്നെ ആകർഷിച്ചിട്ടുണ്ട്. മധ്യപൂർവദേശങ്ങളിലെ ഉൾപ്പെടെ വിദേശരാജ്യങ്ങളിലെ ഭരണാധികാരികളുമായി നല്ല ബന്ധം സൂക്ഷിക്കുകയും അതുവഴി അവിടങ്ങളിലെ പ്രവാസി ഭാരതീയർക്ക് അനുകൂലമായ അന്തരീക്ഷം സൃഷ്ടിക്കുകയും ചെയ്യുന്നതിൽ അദ്ദേഹത്തിന് പ്രത്യേക ശ്രദ്ധ എപ്പോഴുമുണടായിരുന്നുവെന്നും ബി.ആർ.ഷെട്ടി പറഞ്ഞു.