ദുബായ്∙ ഇന്ന് (ഞായർ) മംഗലാപുരത്തെ ആശുപത്രിയിൽ അന്തരിച്ച ദുബായിലെ പ്രമുഖ വ്യവസായിയും ദുബായ് ആസ്ഥാനമായി പ്രവർത്തിക്കുന്ന 'അൽ റെയാമി ഗ്രൂപ്പ്' ഉടമയുമായ കൊടക്കാട്ടേരി പുതിയവീട്ടിൽ ശ്രീധരൻ നമ്പ്യാർ (62) ആയിരക്കണക്കിന് മലയാളികളുടെ ജീവിതം മെച്ചപ്പെടുത്തിയ വ്യവസായി ആയിരുന്നു. സ്വന്തമായി ബിസിനസ് സാമ്രാജ്യം കെട്ടിപ്പടുത്തപ്പോഴും അദ്ദേഹം ദുരിതം അനുഭവിക്കുന്ന നിർധനരെ മറന്നില്ല. ജീവകാരുണ്യ പ്രവർത്തന രംഗത്ത് നിശബ്ദമായി പ്രവർത്തിച്ചുവരിക21യായിരുന്നു അദ്ദേഹം.
രണ്ടുവർഷം മുൻപ് കണ്ണാടിപ്പറമ്പിൽ നടത്തിയ 'അതിരുദ്ര മഹായജ്ഞം' ഏറെ ശ്രദ്ധ നേടിയിരുന്നു. മരണ വിവരം അറിഞ്ഞതോടെ അദ്ദേഹത്തിന് കീഴിൽ ജോലി ചെയ്യുന്ന മൂവായിരത്തോളം പേർ കടുത്ത ദുഃഖത്തിലായി. കണ്ണൂരിലെ കണ്ണാടിപ്പറമ്പ് സ്വദേശിയായ ശ്രീധരൻ 1978 - ലാണ് തൊഴിൽതേടി ദുബായിലെത്തിയത്, പിന്നീട് 1994 - ൽ സ്വന്തമായി അൽ റെയാമി ഗ്രൂപ്പ് സ്ഥാപിച്ചു. ആന്ധ്രാപ്രദേശിൽ ഫാക്ടറിയും പ്രവർത്തിക്കുന്നു. ജീവനക്കാരിൽ ഭൂരിഭാഗവും അദ്ദേഹത്തിന്റെ സ്വദേശമായ മയ്യിൽ, നാറാത്ത്, കണ്ണാടിപ്പറമ്പ് പ്രദേശങ്ങളിലുള്ളവരാണ്.
അർബുദ രോഗബാധയെ തുടർന്ന് പുലർച്ചെ മൂന്നോടെയായിരുന്നു അന്ത്യം. കഴിഞ്ഞ ഒരു വർഷമായി ഇംഗ്ലണ്ട്, മംഗളൂരു തുടങ്ങിയ സ്ഥലങ്ങളിൽ നിന്നുള്ള വിദഗ്ധ ഡോക്ടർമാരുടെ ചികിത്സയിലായിരുന്നു.
ജയലക്ഷ്മിയാണ് ഭാര്യ, മക്കൾ മിഥുൻ (ദുബായ്), അഞ്ജന (മെഡിക്കൽ വിദ്യാർഥിനി). പരേതരായ പി.വി.രയരപ്പൻ നമ്പ്യാർ– ദേവകി ദമ്പതികളുടെ മകനാണ്. സഹോദരങ്ങൾ പ്രഭാകരൻ നമ്പ്യാർ (പരേതൻ), പദ്മനാഭൻ നമ്പ്യാർ , ഭാർഗവി, പുഷ്പവല്ലി, വനജ, പങ്കജ.