സന്ദർശക വീസയിൽ എത്തുന്നവർ മടങ്ങിപ്പോകാൻ വൈകുന്നത് ട്രാവൽ ഏജൻസികളെ പ്രതിസന്ധിയിലാക്കുന്നു. ഇത്തരത്തിൽ വീസാ കാലാവധി കഴിഞ്ഞിട്ടും തിരിച്ചുപോകാതെ മുങ്ങി നടക്കുന്ന മലയാളി യുവാവിനെതിരെ ദെയ്റ ദീനാർ ട്രാവൽ ആൻഡ് ടൂറിസം കമ്പനി യുഎഇ വിദേശ കാര്യ വിഭാഗത്തിന് പരാതി നൽകി. ഇത്തരം ആളുകൾ വലിയ നഷ്ടമാണ് ട്രാവൽസുകൾക്കു വരുത്തി വയ്ക്കുന്നതെന്ന് എംഡി ഫൈസൽ തളങ്കര പറഞ്ഞു.
വീസാ കാലാവധി കഴിഞ്ഞാൽ തിരിച്ച് പോകണമെന്നാണ് നിയമം. ആ ഉറപ്പിലാണ് അധികൃതർ വീസ അനുവദിക്കുന്നത്. സന്ദർശക വീസയിൽ എത്തി തൊഴിലെടുക്കാനോ അനധികൃത പ്രവർത്തനങ്ങളിൽ ഏർപ്പെടാനോ പാടില്ലെന്നാണ് ചട്ടം. പൊതുവെ മലയാളികൾ നിയമം പാലിക്കാറുണ്ട്. എന്നാൽ അടുത്ത കാലത്തായി ചിലർ സൗകര്യം ദുരുപയോഗം ചെയ്യുന്നു.