പ്രണയകഥകളെഴുതാൻ മോഹം. അതു സീരിയലോ സിനിമയോ ആകുമെങ്കിൽ സംവിധാനം ചെയ്യാൻ അതിലേറെ മോഹം. നടി പാർവതി കൃഷ്ണ ഇതൊന്നും വെറുതെ മോഹിച്ചുപോകുന്നതല്ല. സംഗതി വളരെ സീരിയസാണ്. ഇപ്പോൾ തന്നെ മൂന്നു കഥകൾ എഴുതിക്കഴിഞ്ഞു. പ്രണയവല്ലരി പൂത്തുലയുന്ന ഭാവനയാണു മൂന്നിലും. എഴുത്തിനെക്കാൾ മേലെ മറ്റൊരു മോഹം കൂടിയുണ്ട് പാർവതിക്ക്. ബിസിനസ് രംഗത്തു കഴിവു തെളിയിക്കണം.
ബിടെക് കഴിഞ്ഞ് ഇന്റീരിയൽ ഡിസൈനിങ്ങിൽ സ്പെഷലൈസ് ചെയ്തുകൊണ്ടിരിക്കുകയാണ് ഈ കലാകാരി. കോസ്റ്റ്യൂം ഡിസൈനിങ്ങ് ഇപ്പോഴേ സജീവം. തിരുവനന്തപുരത്ത് സെറ്റിലാകുന്നതോടെ ബിസിനസ് വിപുലീകരിക്കുകയാണു ലക്ഷ്യം. പത്തനംതിട്ട കോന്നിക്കാരി പെണ്ണ് തിരുവനന്തപുരത്ത് ചുവടുറപ്പിക്കാനുള്ള കാരണം ഇനിയെന്തിനു ഒളിച്ചുവയ്ക്കണം? അതെ, നടി പാർവതി കൃഷ്ണ വിവാഹിതയാകാൻ പോകുന്നു. തിരുവനന്തപുരം സ്വദേശിയും മ്യൂസിക്ക് ഡയറക്ടറുമായ ബാലഗോപാലാണു വരൻ. സുന്ദരിയും സുന്ദരനും തമ്മിലുള്ള വിവാഹനിശ്ചയം കഴിഞ്ഞു. ഈ വർഷം തന്നെയുണ്ടാകും വിവാഹം.