എഡ്മണ്ട് തോമസ് ക്ലിന്റ്- നിറങ്ങളുടെ രാജകുമാരൻ. ഭൂമിയിൽ ജീവിച്ച 2500 ദിവസങ്ങൾക്കുള്ളിൽ 25000 ത്തോളം ചിത്രങ്ങൾ വരച്ചുകൂട്ടി അകാലത്തിൽ പൊലിഞ്ഞ വിസ്മയ പ്രതിഭ. അധികമാരും അറിയാതെപോയ ആ ക്ഷണികജീവിതം ഒന്നുകൂടി പകർന്നാടാനായി, നിറങ്ങളുടെ രാജകുമാരൻ പുനർജനിക്കുകയാണ് 'ക്ലിന്റ്' എന്ന ചിത്രത്തിലൂടെ. ഹൃദയഹാരിയായ അഭിനയമുഹൂർത്തങ്ങൾ നിറഞ്ഞ അതിഭാവുകത്വങ്ങളില്ലാത്ത ഈ കൊച്ചുചിത്രം ഒരുക്കിയിരിക്കുന്നത് സംവിധായകൻ ഹരികുമാറാണ്.
ക്ലിന്റ് ആയി വെള്ളിത്തിരയിലെത്തുന്നതു തൃശൂർ സ്വദേശി മാസ്റ്റർ അലോക്. ഹൃദ്യവും സൂക്ഷ്മവുമായ അഭിനയമാണ് മാസ്റ്റർ അലോക് കാഴ്ച വച്ചിരിക്കുന്നത്. ഉണ്ണി മുകുന്ദനും റിമ കല്ലിങ്കലുമാണ് ക്ലിന്റിന്റെ മാതാപിതാക്കളായി എത്തുന്നത്. വാണിജ്യ സിനിമകളിൽ മാത്രം തളയ്ക്കപ്പെട്ടിരുന്ന ഉണ്ണി മുകുന്ദനിലെ അഭിനേതാവിനെ കണ്ടെത്തുകയാണ് ചിത്രം. അദ്ദേഹത്തിന്റെ അഭിനയ ജീവിതത്തിലെ മികച്ച പ്രകടങ്ങളിൽ ഒന്നായി ക്ലിന്റിലെ അച്ഛൻവേഷം വിലയിരുത്തപ്പെടും. റിമ ഇതിനുമുൻപും അമ്മവേഷങ്ങൾ തന്മയത്വത്തോടെ അഭിനയിച്ചു ഫലിപ്പിച്ചിട്ടുണ്ട്. ക്ലിന്റിലും ആ പ്രകടനം തുടരുന്നു.
സലിം കുമാർ, കെപിഎസി ലളിത, ജോയ് മാത്യു, രഞ്ജി പണിക്കർ, വിനയ് ഫോർട്ട് എന്നിവർക്കൊപ്പം ബാലതാരങ്ങളായ അക്ഷര, രുദ്ര, നക്ഷത്ര, ദ്രുപത്, അമിത്, അമർ എന്നിവരും അഭിനയിക്കുന്നു. യഥാർഥ ക്ലിന്റിന്റെ മാതാപിതാക്കളായ മുല്ലപ്പറമ്പിൽ തോമസ് ജോസഫും ചിന്നമ്മയും സിനിമയുടെ ഒരു ഭാഗത്ത് അവരായി തന്നെ അഭിനയിക്കുണ്ട്.