ഒാരോ മലയാളിയും കണ്ടിരിക്കേണ്ട സിനിമ. അതാണ് ടേക്ക് ഒാഫ്. അതിതീവ്രമായ ഒരു സംഭവകഥ അതിലും വൈകാരികതയോടെ അഭ്രപാളിയിൽ അവതരിക്കപ്പെട്ടിരിക്കുന്നു. മനോഹരമായ അഭിനയമുഹൂർത്തങ്ങളും അന്താരാഷ്ട്ര സിനിമകളെ പോലും വെല്ലുവിളിക്കുന്ന തരത്തിലുള്ള പശ്ചാത്തലവും മേക്കിങ്ങും കൂടിയായപ്പോൾ മലയാള സിനിമയുടെ മറ്റൊരു തലത്തിലേക്കുള്ള ‘ടേക്ക് ഒാഫ്’ ആയി മാറുന്നു ഇൗ ചിത്രം.
നഴ്സ് എന്നാൽ നാട്ടിലെ മലയാളികൾക്കിടയിൽ അത്ര വലിയ വിലയുള്ള ജോലിയൊന്നുമല്ല. കുടുംബത്തിലെ പ്രാരാബ്ധങ്ങൾ തീർക്കാൻ വിദേശത്ത് ജോലിക്കു പോകുന്ന അവർക്ക് അവിടെ ലഭിക്കുന്ന അംഗീകാരവും പരിഗണനയും ശമ്പളവും വലുതാണ്. എന്നാൽ അമേരിക്കയിലോ ലണ്ടനിലോ പോകുന്ന നഴ്സുമാരുടെ അവസ്ഥയല്ല ഇറാഖിലും ലിബിയയിലും പോകുന്നവരുടേത്. ജോലിക്കായി ഇറാഖിലെത്തുന്ന കുറച്ചു നഴ്സുമാരുടെ നിലനിൽപിന്റെ കഥയാണ് ചിത്രം പറയുന്നത്.