പുതുവൽസര സന്ദേശത്തിൽ പ്രധാൻമന്ത്രി ആവാസ് യോജനയുടെ കീഴിൽ പുതിയ ഭവനനിർമാണ പദ്ധതികൾ പ്രഖ്യാപിച്ച് പ്രധാനമന്ത്രി നരേന്ദ്ര മോദി. പാവങ്ങൾക്കും മധ്യവർഗത്തിനും ഭവനവായ്പ പലിശയിൽ ഇളവ് നൽകുമെന്ന് പ്രധാനമന്ത്രി പറഞ്ഞു. ഒൻപതു ലക്ഷം രൂപ വരെയുള്ളവയ്ക്ക് നാലു ശതമാനവും 12 ലക്ഷം രൂപയ്ക്ക് മൂന്നു ശതമാനവും ഇളവ് നൽകുമെന്നും അദ്ദേഹം പറഞ്ഞു.
∙ നഗരങ്ങളിൽ സാധാരണക്കാർക്ക് വീട് വയ്ക്കാൻ രണ്ടു പദ്ധതികൾ കൊണ്ടുവരും
∙ ഗ്രാമങ്ങളിലെ പഴയ വീട് പുതുക്കാൻ കുറഞ്ഞ പലിശയിൽ വായ്പ നൽകും
∙ കാർഷികവായ്പകള്ക്ക് 20,000 കോടി രൂപ കൂടി അനുവദിച്ചു.
∙ മൂന്നു ലക്ഷം കിസാൻ കാർഡുകൾ റുപേ കാർഡാക്കും
∙ കാർഷികവായ്പകൾക്ക് ആദ്യ 60 ദിവസം പലിശയില്ല
∙ ചെറുകിട വ്യാപാരികൾക്ക് ക്രെഡിറ്റ് കാർഡ് ഗ്യാരണ്ടി നൽകും
∙ ചെറുകിട കച്ചവടക്കാരുടെ രണ്ടു കോടി രൂപ വരെയുള്ള വായ്പകൾക്ക് സർക്കാർ ഗ്യാരണ്ടി നൽകും
∙ ഗർഭിണികൾക്ക് ആശുപത്രിയിലെ പരിചരണത്തിന് 6000 രൂപ നൽകും. ഇത് അവരുടെ അക്കൗണ്ടുകളിലേക്കാകും നിക്ഷേപിക്കുക
∙ മുതിർന്ന പൗരന്മാർക്ക് ക്ഷേമപദ്ധതി കൊണ്ടുവരും. ഏഴര ലക്ഷം രൂപയുടെ നിക്ഷേപത്തിന് മുതിർന്ന പൗരന്മാർക്ക് പത്തു വർഷത്തേക്ക് എട്ടു ശതമാനം വാർഷിക സ്ഥിരപലിശ നൽകും
∙ ക്യാഷ് ക്രെഡിറ്റ് 20 ശതമാനത്തിൽനിന്നും 25 ശതമാനമാക്കി ഉയർത്തും.