ദുബായ്∙ ഐ ഫോൺ വിപണിയിൽ അത്യാധുനിക സവിശേഷതകളുമായി ഇറങ്ങിയ ഐ ഫോൺ 8ന്റെ വിൽപ്പന തകൃതിയായി നടക്കുകയാണ്. എന്നാൽ വിൽപ്പനയുടെ ആദ്യ ദിവസം തന്നെ പന്ത്രണ്ട് ഐ ഫോണുകൾ സ്വന്തമാക്കിയിരിക്കുകയാണ് അൽ എയ്ൻ സ്വദേശി ഇബ്രാഹിം അൽചാംസി. നേരത്തെ തന്നെ ഫോണ്‍ ബുക്ക് ചെയ്താണ് ഇയാൾ ഇത്രയും ഫോണുകൾ സ്വന്തമാക്കിയത്.
തനിക്ക് ഉപയോഗിക്കുന്നതിനോടൊപ്പം കുടുംബാംഗങ്ങൾക്കു കൂടി വേണ്ടിയാണ് ഇത്രയും ഫോൺ ഒരുമിച്ച് വാങ്ങിയതെന്ന് അൽചാംസി മാധ്യമങ്ങളോട് പറഞ്ഞു. കുടുംബത്തോടൊപ്പമാണ് ഐ ഫോണുകൾ വാങ്ങാനായി ഇയാൾ കടയിലെത്തിയത്. ദുബായ് മാളിലെ ആപ്പിൾ സ്റ്റോറിൽ നിന്നാണ് ഫോണുകൾ വാങ്ങിയത്. ദുബായിലെ മാൾ ഓഫ് എമിറേറ്റ്സിലും അബുദാബിയിലെ യാസ് മാളിലും ഐ ഫോൺ 8ന്റെ വിൽപ്പന ഇന്നു രാവിലെ മുതൽ തന്നെ തുടങ്ങി.
64,000 രൂപ മുതലാണ് ഐ ഫോൺ എട്ടിന്റെ വില. യുഎഇയിൽ ഇത് 2,849 ദിര്‍ഹം മുതൽ 3,479 ദിർഹം വരെയാണ്. 3,249 ദിർഹം വരെയാണ് ഐ ഫോൺ 8 പ്ലസിന്റെ വില. വയർലെസ് ചാർജറുകളുമായിറങ്ങിയ ഐ ഫോൺ 8ഉം 8 പ്ലസും ഫോണുകൾ മുന്നിലും പിന്നിലും ഗ്ലാസുകൊണ്ട് നിർമിച്ചിട്ടുള്ളവയാണ്.
