സീതാറാം യച്ചൂരി രാജ്യസഭയിലേക്ക് മല്സരിക്കില്ല.യച്ചൂരി മല്സരിക്കേണ്ടെന്ന് സി.പി.എം കേന്ദ്ര കമ്മിറ്റിയില്തീരുമാനിക്കുകയായിരുന്നു. മല്സരിക്കണമെന്ന ബംഗാള് ഘടകത്തിന്റെ ആവശ്യം വോട്ടിനിട്ട് തള്ളി. രാജ്യസഭാ സ്ഥാനാര്ഥിയാകാനില്ലെന്ന് സീതാറാം യച്ചൂരി കഴിഞ്ഞ ദിവസം വ്യക്തമാക്കിയിരുന്നു. സീതാറാം യച്ചൂരി രാജ്യസഭയിലേക്ക് വീണ്ടും മല്സരിക്കേണ്ടതില്ലെന്ന നിലപാടില് പൊളിറ്റ് ബ്യൂറോ ഉറച്ചു നിന്നിരുന്നു. യച്ചൂരിയെ പിന്തുണച്ച് വിഎസ് അടക്കമുളളവർ രംഗത്തെത്തിയിരുന്നു.
ബംഗാളില് നിന്നുള്ള രാജ്യസഭാംഗമായ സീതാറാം യച്ചൂരിയുടെ കാലാവധി അടുത്തമാസം 18 നാണ് അവസാനിക്കുന്നത്. ബംഗാളിലും ഗുജറാത്തിലും മധ്യപ്രദേശിലുമായി 10 രാജ്യസഭാ സീറ്റുകളിലേക്ക് അടുത്തമാസം എട്ടിനാണ് തിരഞ്ഞെടുപ്പ്. നാമനിര്ദേശപത്രിക സമര്പ്പിക്കാനുള്ള അവസാന തിയതി വെള്ളിയാഴ്ച്ചയാണ്. ബംഗാളില് മല്സരം നടക്കുന്ന ആറില് അഞ്ചുസീറ്റും ജയിക്കാന് തൃണമൂലിന് സാധിക്കും. അവസാനിക്കുന്ന ഒരു സീറ്റില് സീതാറാം യച്ചൂരിയാണ് സ്ഥാനാര്ഥിയെങ്കില് പിന്തുണയ്ക്കാമെന്ന് കോണ്ഗ്രസ് വ്യക്തമാക്കിയിരുന്നു.
എന്നാല് കോണ്ഗ്രസ് പിന്തുണയോടെ യച്ചൂരി രാജ്യസഭയിലെത്തുന്നതിനെ കാരാട്ട് പക്ഷം ശക്തമായി എതിർത്തു. കേരളഘടകത്തിന്റെ പിന്തുണ കാരാട്ട് പക്ഷത്തിനാണ്. രാജ്യസഭയിലേക്ക് ഒരാള് പരമാവധി രണ്ടുതവണ അംഗമായാല് മതിയെന്ന പാര്ട്ടി കീഴ്വഴക്കം യച്ചൂരിക്ക് വേണ്ടി ഭേദഗതി ചെയ്യേണ്ടെന്നാണ് പിബിയില് ഭൂരിപക്ഷ നിലപാട്. എന്നാല് ഇപ്പോള് യച്ചൂരിയെ വിജയിപ്പിക്കാനുള്ള അവസരം മുതലെടുത്തില്ലെങ്കില് ബംഗാളില് നിന്ന് രാജ്യസഭയില് അംഗങ്ങളില്ലാത്ത അവസ്ഥയാകുമെന്നാണ് ബംഗാള് ഘടകത്തിന്റെ നിലപാട്.