റബറിന്റെ താങ്ങുവില 200 രൂപ ആക്കണമെന്നു പ്രതിപക്ഷം നിയമസഭയിൽ. എല്ലാ നാണ്യവിളകൾക്കും വിലസ്ഥിരതാ ഫണ്ട് ഏർപ്പെടുത്തണമെന്നും പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. ഈ സർക്കാർ അധികാരത്തിൽ വന്നതിനു ശേഷം 748 കോടി രൂപ റബർ സബ്സിഡി ഇനത്തിൽ വിതരണം ചെയ്തിട്ടുണ്ടെന്ന് കൃഷി മന്ത്രി വി എസ് സുനിൽ കുമാർ അറിയിച്ചു. ആസിയാൻ ഉൾപ്പെടെ കേന്ദ്ര സർക്കാരുകൾ ഒപ്പിട്ട കരാറുകളാണ് നാണ്യവിളയുടെ വില തകർച്ചക്ക് കാരണം. കുരുമുളക് ഇറക്കുമതിയുമായി ബന്ധപ്പെട്ട RCP കരാർ ഒപ്പിടുന്നതിലെ ആശങ്ക കേന്ദ്രത്തെ അറിയിച്ചതായും കൃഷി മന്ത്രി പറഞ്ഞു. കാർഷിക മേഖലയിലെ പ്രതിസന്ധി ചൂണ്ടിക്കാട്ടി സണ്ണി ജോസഫ് നൽകിയ അടിയന്തര പ്രമേയ നോട്ടിസിൽ സംസാരിക്കുകയായിരുന്നു ഇരുവരും. മന്ത്രിയുടെ മറുപടിയിൽ തൃപ്തരാകതെ പ്രതിപക്ഷം സഭയിൽ നിന്ന് ഇറങ്ങിപ്പോയി.
×