കൊടുംചൂടിൽ ചുട്ടുപൊളളുന്ന പാലക്കാടൻ കാഴ്ചകളുമായി ഒരു സംഗീത ആൽബം. വെളളത്തിനായി നോട്ടോട്ടമോടുന്നവരുടെ വേദനപങ്കുവയ്ക്കുന്നതിനൊപ്പം ജലനിരപ്പുതാഴ്ന്ന അണക്കെട്ടുകളും പുഴകളുമൊക്കെ ദൃശ്യങ്ങളായുണ്ട്.
മഴയില്ലാത്ത നാട്ടിൽ പാലക്കാടൻ ചൂടിന്റെ തീവ്രത നേരിട്ടറിഞ്ഞവരുടെ കൂട്ടായ്മയാണ് ഇൗ സംഗീത ആൽബം തയ്യാറാക്കിയത്. ജലസംരക്ഷണം , മരം വച്ചുപിടിപ്പിക്കൽ , എന്നിവയൊക്കെ പാഴ്‌വാക്കാകരുതെന്ന ഒാർമപ്പെടുത്തലിന് മുന്നറിയിപ്പായി ചില കാഴ്ചകളും.
ജലനിരപ്പുതാഴ്ന്ന വാളയാർ , മലമ്പുഴ അണക്കെട്ടുകൾ. ഭാരതപ്പുഴയും ഗായത്രിയും ചിറ്റൂർപുഴയുമൊക്കെ വേനലിന്റെ കാഠിന്യം വരച്ചുകാട്ടുന്നു. ആറു മിനുട്ട് ദൈർഘ്യമുളള ആൽബം ആറു ദിവസം കൊണ്ടാണ് ചിത്രീകരിച്ചത്. കൊടുവായൂർ സ്വദേശി ഷെയ്ക് ഇലാഹിയാണ് സംഗീതം നൽകിയതും സംവിധാനവും നിർവഹിച്ചതും. സാമൂഹിക മാധ്യമങ്ങളിലൂടെയാണ് ആൽബത്തിന്റെ പ്രചാരണം.
×