ബലിതര്‍പ്പണത്തിനെത്തുന്ന ഭക്തലക്ഷങ്ങളെ വരവേല്‍ക്കാന്‍ ആലുവ മണപ്പുറമൊരുങ്ങി. മഹാദേവക്ഷേത്രത്തില്‍ രാവിലെ പ്രഭാത പൂജകള്‍ കഴിഞ്ഞാല്‍ പുഴയോരത്തെ ബലിത്തറകളില്‍ തര്‍പ്പണം ആരംഭിക്കും. സുരക്ഷയ്ക്കായി 2000 പൊലീസുകാരെ നിയോഗിച്ചിട്ടുണ്ട്
ശിവരാത്രി വെള്ളിയാഴ്ചയും കുംഭത്തിലെ അമാവാസി ഞായറാഴ്ചയും ആയതിനാല്‍ ഇക്കൊല്ലം മൂന്നുദിവസം മണപ്പുറത്തേക്കു ഭക്തജനപ്രവാഹമുണ്ടാകും. വെളളിയാഴ്ച രാവിലെ മുതല്‍ ബലിതര്‍പ്പണത്തിന് സൗകര്യമുണ്ടാകും. അര്‍ധരാത്രി ക്ഷേത്രത്തില്‍ ശിവരാത്രി വിളക്കും വിശേഷാല്‍ പൂജകളും നടക്കുന്നതോടെ ബലിതര്‍പ്പണം ഒൗപചാരികമായി ആരംഭിക്കും. മണപ്പുറത്തിന്‍റെ ഏഴുകിലോമീറ്റര്‍ ചുറ്റളവില്‍ ഭക്തജനങ്ങള്‍ക്ക് ഇന്‍ഷുറന്‍സ് പരിരക്ഷ ഏര്‍പ്പെടുത്തുന്നതും ഹരിത പ്രോട്ടോക്കോള്‍ നടപ്പാക്കുന്നതുമാണ് ഇത്തവണ സംഘാടനത്തിലെ പുതുമ.
മണപ്പുറത്തിന് അക്കരെയുളള അദ്വൈതാശ്രമത്തിലും പൂജകളുണ്ടാകും. ഭക്തരുടെ തിരക്ക് പരിഗണിച്ച് ഗതാഗതത്തിന് നിയന്ത്രണം ഏര്‍പ്പെടുത്തിയിട്ടുണ്ട്.
