എറണാകുളം സൗത്ത് മേല്പ്പാലത്തിനടുത്ത് സ്വകാര്യ മൊബൈല് ഫോണ് കമ്പനിയുടെ ടവറിനെതിരെ നാട്ടുകാരുടെ പ്രതിഷേധം. ടവറില് നിന്ന് പുറത്തു വരുന്ന മാലിന്യം ദേഹാസ്വാസ്ഥ്യമുണ്ടാക്കുന്നുവെന്നാണ് നാട്ടുകാരുടെ പരാതി. നഗരസഭയില് പരാതിപ്പെട്ടിട്ടും നടപടിയില്ല.
ഈ ടവറാണ് പ്രശ്നം. സൗത്ത് മേല്പ്പാലത്തിനടുത്ത് കണ്ണന്തോടത്ത് റോഡിലെ ഈ ടവറില് ജനറേറ്റര് പ്രവര്ത്തിക്കുന്ന േനരത്തെല്ലാം കറുത്ത് കൊഴുത്ത ദ്രാവകവും പൊടിയും റോഡിലേക്ക് തെറിക്കുന്നെന്നാണ് സമീപത്തെ വീടുകളിലും ഓഫിസുകളിലും ഉളളവരുടെ പരാതി. ഈ പൊടി വീണാല് ദേഹമാസകലം ചൊറിഞ്ഞു തടിക്കുമത്രെ. റോഡരികിലെ ചെടികളുടെ ഇലകള് കരിഞ്ഞുണങ്ങാന് കാരണവും ഈ മാലിന്യമാണെന്ന് നാട്ടുകാര് പറയുന്നു. റോഡരികില് വാഹനങ്ങള് പാര്ക്ക് ചെയ്യാനാകുന്നില്ലെന്നത് മറ്റൊരു പ്രശ്നം.
പരാതി നഗരസഭയില് അറിയിച്ചെങ്കിലും ഉദ്യോഗസ്ഥര് വന്നു നോക്കിപ്പോയതല്ലാതെ ഒന്നും സംഭവിച്ചില്ല. ടവര് സ്ഥാപിച്ച സ്വകാര്യ കമ്പനിക്കാരുടെ മേല്വിലാസമറിയില്ലെന്ന വിചിത്രമായ വിശദീകരണമാണ് കെട്ടിട ഉടമ നല്കുന്നത്.