ദിയ ഫാത്തിമ (രണ്ടു വയസ്സ്)- 2014 ഓഗസ്റ്റ് 1
കണ്ണൂർ ഇരിട്ടി കീഴ്പ്പള്ളി കോഴിയോട്ടെ വീട്ടുമുറ്റത്തു കളിച്ചു കൊണ്ടിരുന്ന ഈ പിഞ്ചുകുഞ്ഞിനെ മിനിറ്റുകൾക്കിടയിലാണു കാണാതായത്. മാതാവ് ഭക്ഷണം എടുക്കാൻ അകത്തേക്കു പോയി തിരിച്ചു വന്നപ്പോൾ കുട്ടിയെ കാണാനില്ല.
കൈത്തോട്ടിൽ ഒഴുകിപ്പോയെന്നായിരുന്നു ആദ്യ സംശയം. സകല തോടുകളിലും പുഴകളിലും ആഴ്ചകളോളം തിരച്ചിൽ നടത്തിയെങ്കിലും കണ്ടെത്താനായില്ല. പിച്ചവച്ചുതുടങ്ങിയ കുഞ്ഞ് 85 മീറ്റർ ദൂരത്തുള്ള പുഴയിലെത്താൻ സാധ്യതയില്ലെന്നു ബന്ധുക്കൾ.
അങ്കമാലിയിൽ സ്ത്രീക്കും പുരുഷനും മൂന്നു കുട്ടികൾക്കുമൊപ്പം ദിയയുടെ രൂപസാദൃശ്യമുള്ള കുട്ടി നിൽക്കുന്ന വിഡിയോ ബന്ധുക്കൾക്കു ലഭിച്ചിരുന്നു. ഇത് പൊലീസ് കൂടുതൽ അന്വേഷിച്ചില്ലെന്നു പരാതിയുണ്ട്.
താഹിർ (രണ്ടു വയസ്സ്)- 1996 സെപ്റ്റംബർ 20
കോട്ടയം ജില്ലയിലെ ഈരാറ്റുപേട്ടയിൽ ആനക്കല്ല് പാറയിൽ ജലീൽ –റഷീദ ദമ്പതികളുടെ മൂത്ത മകൻ. റോഡരികിലെ വീട്ടുമുറ്റത്തു കളിച്ചുകൊണ്ടിരിക്കെ കാണാതായി. പൊലീസും ക്രൈംബ്രാഞ്ചും അന്വേഷിച്ചിട്ടും വിഫലം. വർഷങ്ങൾക്കു ശേഷം എറണാകുളത്ത് കണ്ടെത്തിയ കുട്ടി താഹിർ ആണെന്നു സംശയം ഉയർന്നെങ്കിലും ഡിഎൻഎ പരിശോധനയിൽ അല്ലെന്നു കണ്ടെത്തി.
രാഹുൽ (ഏഴു വയസ്സ്)- 2005 മേയ് 18
ആലപ്പുഴ ആശ്രമം വാർഡ് രാഹുൽ നിവാസിൽ രാജു-മിനി ദമ്പതികളുടെ മകൻ. വീടിനു സമീപം കൂട്ടുകാർക്കൊപ്പം ക്രിക്കറ്റ് കളിച്ചുകൊണ്ടിരിക്കെ കാണാതായി. 12 വർഷം പിന്നിട്ടിട്ടും സിബിഐ വരെ അന്വേഷിച്ചിട്ടും ചുരുളഴിക്കാനായില്ല.
പ്രവീൺ രാജ് (11)- 2014 സെപ്റ്റംബർ 15
തിരുവനന്തപുരം പൂവാറിനു സമീപം നമ്പ്യാതി ബി.എൽ. ഭവനിൽ രാജൻ – പ്രസന്ന ദമ്പതികളുടെ മകൻ. പിതാവും സഹോദരനുമൊത്ത് കടൽ കാണാൻ പോയ ദിവസമാണ് പ്രവീണിനെ കാണാതായത്. 2016 ഒക്ടോബറിൽ കോട്ടയം റയിൽവേ സ്റ്റേഷനിൽ കണ്ടതായി അഭ്യൂഹമുണ്ടായെങ്കിലും അതു മറ്റൊരു കുട്ടിയായിരുന്നു.