ഒരു വയസ്സാകുന്നതിനു മുന്നേ കുട്ടികൾക്ക് ഫ്രൂട്ട്ജ്യൂസ് നൽകേണ്ടെന്ന് ഗവേഷകർ. മുലപ്പാലോ ഇൻഫന്റ് ഫോർമുലകളോ നൽകിയാൽ മതിയെന്നും ഇവർ പറയുന്നു. ഫ്രൂട്ട് ജ്യൂസിൽ നിന്ന് യാതൊരുവിധ പോഷണങ്ങളും കുഞ്ഞുങ്ങൾക്ക് ലഭിക്കുന്നില്ല. മാത്രമല്ല ഈ ശീലം അവരെ അമിതവണ്ണത്തിലേക്കു നയിക്കുകയും ചെയ്യുമെന്നും അമേരിക്കൻ അക്കാദമി ഓഫ് പീഡിയാട്രിക്സിന്റെ പഠനം പറയുന്നു.
ഫ്രൂട്ട്ജ്യൂസുകൾ കുഞ്ഞുങ്ങളുടെ ആരോഗ്യത്തിന് ഉത്തമമാണെന്നാണ് മാതാപിതാക്കൾ കരുതുന്നത്. എന്നാൽ ജ്യൂസുകൾ ഒരിക്കലും ഫ്രെഷ് ഫ്രൂട്ടിനു പകരമാകില്ല. കൂടുതൽ കാലറിയും പഞ്ചസാരയും ചേർത്ത് ഇവ പാക്കറ്റുകളിലാക്കി വിൽക്കുകയാണ് ചെയ്യുന്നതെന്ന് അമേരിക്കൻ അക്കാദമി ഓഫ് പീഡിയാട്രിക്സിലെ മെൽവിൻ ഹെയ്മൻ പറയുന്നു.
മുതിർന്ന കുട്ടികൾക്ക് ചെറിയ അളവിൽ ഇവ നൽകാം. എന്നാൽ ഒരു വയസ്സിൽ താഴെയുള്ള കുട്ടികൾക്ക് ഇവ തീർത്തും അനാവശ്യമാണ്. പഴച്ചാറുകളുടെ അമിതോപയോഗം പല്ലുകളുടെ നാശത്തിനും കാരണമാകുന്നുണ്ട്.