തടികുറയ്ക്കാന്‍ മണിക്കൂറുകള്‍ വർക്ക് ഔട്ട് ചെയ്ത് കഷ്ടപ്പെടുന്നവരുണ്ട്. നമുക്കും തടികൂടുന്നു പക്ഷേ ജിമ്മിലൊക്കെ പോവാൻ എവിടെ സമയം എന്നു പറഞ്ഞ് മടിപിടിക്കേണ്ട. ദിവസവും ഒരു പത്ത് സ്റ്റെപ്പെങ്കിലും കയറുകയും ഇറങ്ങുകയും ചെയ്യുന്നയാളാണോ? അല്ലെന്നാണ് ഉത്തരമെങ്കിൽ ലിഫ്റ്റ് ഉപയോഗിക്കുന്നതിന് പകരം പടികള്‍ കയറുക. സ്വഭാവികമായ ഇത്തരം വ്യായാമങ്ങളിലൂടെ തടികുറയ്ക്കുകയും ചെയ്യാം അതോടൊപ്പം ഹൃദയാരോഗ്യവും സംരക്ഷിക്കാം.
കാലുകളുടെ പേശികൾക്ക് കരുത്തും അഴകും നൽകാനും ശരീരഭാരം കുറയ്ക്കാനുമൊക്കെ പടികൾ കയറൽ സഹായകമാകും. മാത്രമല്ല കൂടുതൽ വർക്ക് ഔട്ട് ആവശ്യമായവർക്ക് സ്റ്റെയർ റൺ പോലുള്ള അത്യാവശ്യം വിയർപ്പിക്കുന്ന വ്യായാമങ്ങളും പരീക്ഷിക്കാം. 30 സെക്കൻഡിനുള്ളിൽ കുറച്ചു പടികള്‍ കയറുകയും ഇറങ്ങുകയും ചെയ്യുകയാണ് സ്റ്റെയർറണ്ണിൽ ചെയ്യുക. ഒരു വശത്തേക്ക് തിരിഞ്ഞ് പടികൾ കയറുന്നതും ഒരു പടിയിൽ കാൽ ഉയർത്തിവച്ചശേഷം രണ്ടാമത്തെ കാൽ താഴ്ത്തുകയും ഉയർത്തുകയും ചെയ്യുന്ന രീതിയിലുള്ള വ്യായാമരീതികളും പരീക്ഷിക്കാം.
