.jpg.image.160.84.jpg)
സ്വന്തം രാജ്യത്തിന്റെ തലസ്ഥാന നഗരിയിൽ നിന്നും 20 കിലോമീറ്റർ മാത്രം അകലെ കണ്ട ചില കാഴ്ചകൾ അയാൾ കാമറയിൽ പകർത്തിയപ്പോൾ ആ രാജ്യം തന്നെ ഞെട്ടിത്തരിച്ചു. ഇറാൻ സ്വദേശിയായ സ്വതന്ത്ര ഫൊട്ടോഗ്രാഫർ സയീദ് ഗോലംഹൊസിനി കഴിഞ്ഞ ദിവസം പുറത്തു വിട്ട ഏതാനും ചിത്രങ്ങളാണ് ലോകമെങ്ങും വാർത്തയായിരിക്കുന്നത്. നഗരത്തിനു പുറത്തുള്ള ശവക്കല്ലറകളിൽ ജീവിക്കുന്ന ആളുടെ ചിത്രങ്ങളാണ് ഇവ. രാജ്യതലസ്ഥാനമായ ടെഹ്റാനിൽ നിന്നും 20 കിലോമീറ്റർ മാത്രം അകലെയാണ് ഈ കരളലിയിക്കും കാഴ്ച. ചിത്രങ്ങൾ ഇറാൻ പ്രസിഡന്റ് ഹസൻ റുഹാനിയുടെ ശ്രദ്ധയിലെത്തിയപ്പോൾ ‘‘പാലങ്ങൾക്കടിയിലും പെട്ടിയിലുമെല്ലാം ഉറങ്ങുന്ന ആളുകളെക്കുറിച്ചു കേട്ടിട്ടുണ്ട്. പക്ഷെ ശവക്കല്ലറയ്ക്കുള്ളിൽ ജീവിക്കുന്ന ആളുകളെക്കുറിച്ച് കേട്ടിട്ടില്ല’’ എന്ന് അദ്ദേഹം പ്രതികരിച്ചു. ആണവശക്തിയെന്ന് അവകാശപ്പെടുമ്പോഴും ഇതിനുള്ള ആഗോള അനുമതിക്കു കാത്തിരിക്കുമ്പോഴും രാജ്യം കടുത്ത സാമ്പത്തിക പ്രതിസന്ധിയിൽ തന്നെയാണ്. വരുന്ന മേയിൽ റൂഹാനി അടുത്ത നാലു വർഷം കൂടി പ്രസിഡന്റാകാനുള്ള തിരഞ്ഞെടുപ്പ് നേരിടാനിരിക്കുകയാണ്.
